Rossiyaning Yoqutiston federal hududida olti kishi qo‘l uchun antiseptikni ichish oqibatida vafot etdi. Yana uch kishi kasalxonaga yotqizilgan, shifokorlar ularning ahvoli o‘ta og‘ir ekanligini ma’lum qilgan, deb yozmoqda “Interfaks”.
“Rospotrebnadzor”ning mahalliy bo‘linmasi bergan ma’lumotlarga ko‘ra, Tattin tumanida yashovchi fuqarolar 18-noyabr kuni do‘kondan besh litrli kanistrda qo‘lni tozalash uchun antiseptik sotib olgan.
Ularning uch nafari sanitayzerni ichgan zahoti halok bo‘lgan, yana uch kishi shifoxonada vafot etgan. Ikki va undan ortiq fuqaroning o‘limi tufayli jinoyat ishi ochilgan. Do‘kondagi antiseptikning qolgan qismi ekspertiza uchun olingan.
2016-yil dekabr oyida Irkutskda 123 nafar odam vanna uchun “Boyarishnik” konsentratidan zaharlangan, ularning 78 nafari vafot etgandi. Jabrlanuvchilar etil spirti o‘rniga o‘lim xavfi kuchli metil spirti (metanol) qo‘shilgan konsentratni alkogol o‘rniga iste’mol qilgan. Irkutskdagi ushbu ommaviy zaharlanishdan so‘ng tarkibida spirt mavjud bo‘lgan mahsulotlarni ishlab chiqarish va sotishni cheklash masalasi keskin muhokama qilingan. 2017-yilda Rossiyada tarkibida alkogol va spirt bo‘lgan mahsulotlarni ishlab chiqarishdagi qoidabuzarliklarga nisbatan ma’muriy javobgarlikni kuchaytirish haqida qonun qabul qilingan.
Avval mart oyida Eronda 7 kishi koronavirusdan himoyalanish uchun metanol ichib vafot etgani, shuningdek, Turkiyaning Istanbul shahrida qalbaki alkogol mahsulotlarini iste’molidan zaharlanish oqibatida 37 nafar turkmanistonlik hayotdan ko‘z yumgani haqida xabarlar berilgandi.
Izoh (0)