Juda qimmat avariya: Britaniyada Rolls-Royce Ghost Lamborghini Urus’ning orqasidan borib urdi

Britaniyaning Uolsoll shaharchasida Rolls-Royсe Ghost Lamborghini Urus’ning orqasiga kelib urilib, yo‘l-transport hodisasini sodir etdi, deb yozadi CARakoom.

Rolls-Royce’ni boshqargan avariya aybdori voqea joyidan piyoda yurib qochib ketgan. Uest-Midlends politsiyasining ma’lumotlariga ko‘ra, u mashinadan tashqari, o‘z shaxsini tasdiqlovchi hujjatlarni qoldirib ketgan. Shu sababli aybdorni topish qiyinchilik tug‘dirmaydi.

Taxminlarga ko‘ra, Rolls-Royce haydovchisi mast holda bo‘lgan yoki avtomobil boshqarish huquqiga ega bo‘lmagan.

Avariya surati e’lon qilingan Twitter’dagi post ostida qoldirilgan versiyalardan biriga ko‘ra, Rolls-Royce Ghost mahalliy kompaniyalarning biridan ijaraga olingan.

Avvalroq britaniyalik teleboshlovchi ko‘rsatuv suratga olish jarayonida Lamborghini’da avariyaga uchragani to‘g‘risida xabar berilgandi.