Oliy Majlis Qonunchilik palatasi deputatlari tomonidan muhokama qilinayotgan 2020-yil 9 oylik yakunlari bo‘yicha Davlat budjeti va davlat maqsadli jamg‘armalari budjetlarining ijrosi to‘g‘risidagi hisobotda budjet intizomining buzilishi holatlari qayd etilgan.
Hisobot davrida o‘tkazilgan nazorat tadbirlari davomida 129,1 milliard so‘m budjet ijrosida kamomad va asossiz xarajatlar aniqlangani deputatlar tomonidan keskin tanqid qilingan.
Xususan, pandemiya bilan bog‘liq murakkab vaziyat bo‘lishiga qaramay, sog‘liqni saqlash sohasiga ajratilgan budjet mablag‘larining qariyb 22 milliard so‘mi bemaqsad sarflangan. Koronavirusga qarshi kurashish uchun jalb etilgan tibbiyot muassasalarida Inqirozga qarshi kurashish jamg‘armasidan ajratilgan mablag‘larning 70,7 milliard so‘mi qoidalarga amal qilmagan holda, sarflab yuborilgan.
Maktabgacha ta’lim vazirligi tizimida 10 milliard, Uy-joy kommunal xizmat ko‘rsatish vazirligi tizimida 6,3 milliard, Suv xo‘jaligi tizimida 4 milliard so‘m miqdorida moliyaviy qonunbuzilish holatlariga yo‘l qo‘yilgan.
“Kun.uz”ning yozishicha, budjet intizomining buzilish holatlari borasida Qashqadaryo va Andijon viloyatlari “yetakchilik qilmoqda”. Quyidagi ro‘yxatda qaysi viloyatda qancha budjet mablag‘lari asossiz ishlatilgani keltirilgan.
- Qashqadaryoda – 14,1 milliard so‘m;
- Andijonda – 12,8 milliard so‘m;
- Farg‘onada – 11,1 milliard so‘m;
- Surxondaryoda – 10,6 milliard so‘m;
- Namanganda – 9,9 milliard so‘m;
- Jizzaxda – 9,8 milliard so‘m;
- Samarqandda – 9,2 milliard so‘m;
- Toshkent viloyatida – 6,5 milliard so‘m;
- Xorazmda – 4,2 milliard so‘m;
- Toshkent shahrida – 9,8 milliard so‘m;
- Qoraqalpog‘iston Respublikasida – 6,1 milliard so‘m.
Buxoro viloyatida sog‘likni saqlash tizimidagi 12 ta tibbiyot muassasalarida tez tibbiy yordam xodimlariga budjetdan va homiylar hisobidan berilgan bir martalik moddiy yordam pullarining hisoblab to‘lanishida xodimlarning ishlayotgan o‘rin birliklariga nisbatan moddiy yordam pullarining noto‘g‘ri hisoblab to‘lanishi oqibatida jami 1 milliard 108,4 million so‘m budjet mablag‘i asossiz sarflangan.
Jizzax viloyati G‘allaorol tuman halq ta’lim bo‘limida 2020-yil yanvar—aprel oylarida lavozim maoshlariga 472,3 million so‘m mukofot va moddiy yordam pullari asossiz qo‘shib to‘langan.
Avvalroq O‘zbekistonda 2020-yilda budjet prognozini bajarish uchun tadbirkorlardan 823 milliard so‘m ortiqcha soliq undirilgani ma’lum bo‘lgandi.
Izoh (0)