Ayollarni aynan ayolligi uchun ishga olmagan yoki homilador ayol xodimga nisbatan mehnat munosabatlarini buzgan rahbarlar 10-12 million so‘mgacha jarimaga tortilmoqda. Bu haqda bandlik va mehnat munosabatlari vaziri o‘rinbosari Bahodir Umurzoqov “Daryo” muxbiri Musulmonbek Ibrohimovga bergan qisqacha intervyusida aytib o‘tdi.
Bahodir Umurzoqovning ta’kidlashicha, ayollarni ishdan keyin tungi vaqtlarda qolib ishlay olmasligi, farzand ko‘rgandan so‘ng ta’tilga chiqib ketishini hisobiga ishga olmaslik holatlari avvaldan ko‘p bo‘lgan.
“Bizda ayollarning asosiy vazifasi bola tug‘ish, deb qaraladi. Universitet, institutlardagi talaba-qizlarimiz asosan 3-4 kursda o‘qiyotgan vaqtda turmushga chiqadi. O‘qishni tugatib, homilador holida ish so‘rab boradi. Saviyasi past ko‘p rahbarlar homilador ayolni ishga olmaydi – bo‘sh joy yo‘q, deydi. Ana o‘sha gaplar bo‘yicha borib tekshirsak, bo‘sh ish o‘rni bo‘laturib, atayin ishga olmagan bo‘ladi”, – dedi Umurzoqov.
Suhbat davomida vazir o‘rinbosari mehnat inspeksiyasi tomonidan ayollarni aynan ayolligi uchun ishga olmagan yoki homilador ayol xodimga nisbatan mehnat munosabatlarini buzgan rahbarlar 10-12 million so‘mgacha jarima bilan jazolanayotganini aytib o‘tdi.
“Agar bu kabi holat takrorlansa, jinoiy javobgarlikka tortish masalasi ko‘rib chiqiladi. Misol uchun, ayollarning buzilgan huquqlarini tiklash maqsadida sudlarga 279 ta da’vo arizasi kiritildi. Natijada 115 nafar ayol ishga tiklandi. Shuningdek, 199 nafar ayolning ish haqi undirib berildi”, – dedi u.
Bandlik va mehnat munosabatlari bergan ma’lumotga ko‘ra, 2020-yilning uchinchi choragida ayollar orasida ishsizlik darajasi 14,7 foizni tashkil etgan.
Izoh (0)