Toshkent—Hojikent yo‘nalishi bo‘yicha harakatlanayotgan shaharlararo elektropoyezd temiryo‘l izlari orasida uxlab yotgan mast erkakni turtib yubordi. Bu haqda IIV Transportda xavfsizlikni ta’minlash bosh boshqarmasi xabar berdi.
11-noyabr kuni soat 20:50 da Toshkent mintaqasi temiryo‘l TXTBga kelib tushgan ma’lumotga ko‘ra, shaharlararo harakatlanayotgan elektropoyezd Chirchiq—Arancha temiryo‘l bekatlari oralig‘i 37-kilometrida harakatlanib ketayotgan vaqtida noma’lum erkak kishini turtib yuborganligi sababli to‘xtagan.
Voqea joyiga chiqilganda ushbu noma’lum shaxs Toshkent viloyati Bo‘stonliq tumanida yashovchi, 1976-yilda tug‘ilgan U.T. ekanligi va temiryo‘l izlari orasida mast holatda uxlab yotganligi sababli elektropoyezd to‘xtashga majbur bo‘lganligi aniqlangan.
Ushbu fuqaroga birinchi tibbiy yordam ko‘rsatilib, Chirchiq shahar Shoshilinch tibbiy yordam bo‘limiga yuborilgan. Poyezd soat 20:35 da to‘xtab, soat 20:57 da yo‘nalishi bo‘yicha harakatlanib ketgan.
Mazkur holat yuzasidan surishtiruv ishlari davom etmoqda.
Avvalroq Samarqandda yuk poyezdi quloqchin taqqan yigitni urib ketmaslik uchun favqulodda to‘xtashni amalga oshirgani, shuningdek, 2020-yilning yanvarida Samarqand viloyatida poyezd urib ketishi oqibatida uch kishi, jumladan, 8-sinf o‘quvchisi halok bo‘lgani to‘g‘risida xabar berilgandi.
Izoh (0)