“Yura davri dunyosi 3” filmining suratga olish ishlari yakunlandi. Kartina yakuniga qadar 40 000 ta COVID-19 testi o‘tkazildi

Buyuk Britaniyada “Yura davri dunyosi”ning uchinchi qismini suratga olish ishlari yakunlandi. Bu haqda “Kinopoisk” xabar beradi.

“Yura davri dunyosi 3” COVID-19 pandemiyasi tufayli uzoq tanaffusdan so‘ng suratga olish ishlarini davom ettirgan birinchi film hisoblanadi. Film rejissori Kolin Trevorrou so‘zlariga ko‘ra, Universal kompaniyasi profilaktika choralari bilan shug‘ullanish uchun xususiy sog‘liqni saqlash tashkilotini yollagan. U suratga olish maydonchasida 40 mingdan ortiq testlarni o‘tkazgan, ularning yuzga yaqini ijobiy, ba’zilari esa noto‘g‘ri natijani qayd etgan. Shuningdek, suratga olish maydonchasiga kirishdan avval barchaning tana harorati o‘lchangan.

Xavfsizlik choralarini tashkil etish hammasi bo‘lib Universal’ga 6-8 million dollarga tushdi. Ushbu miqdor aktyorlar va suratga olish guruhi uchun maxsus ajratilgan mehmonxonani ham o‘z ichiga oladi. “Biz birga yashadik, ovqatlandik, hikoyalar aytdik, qo‘rquv va umidlar bilan bo‘lishdik, maysazorda uchar disk o‘ynadik. Zavqlanish uchun sabab topish qiyin bo‘lgan bir paytda biz juda ko‘p xursandchiliklar qildik, − deydi film rejissori Trevorrou. – Biz sevganlarimizga iloji boricha yaqin bo‘lish kerak bo‘lgan vaqtda ulardan uzoqda edik”.

Rejissorning fikriga ko‘ra, izolyatsiya tajribasi filmni yaxshilashga yordam beradi, sababi aktyorlar bu paytda bir-biriga juda yaqinlashgan edi. “Dam olish kunlari mashq qildik, qahramonlar ustida ishladik, bu esa filmni hissiy jihatdan ancha yorqinroq qiladi. Shuningdek, Trevorrou ushbu kartinani koronavirus davrida dolzarb bo‘lib qolishini ta’kidladi: “Bu kartina birgalikda yashash va omon qolish zarurligi haqidagi film. Agar pandemiya bizga nimanidir o‘rgata olgan bo‘lsa, demak, turli avlodlar bir-birlarini himoya qilishi kerak”.

Bundan tashqari, rejissor filmning kinoteatrlarda namoyish etilishiga umid qilayotganini ham qo‘shimcha qildi. Film premyerasi 2022-yil 10-iyunda bo‘lib o‘tishi rejalashtirilgan.