Iqtisodiy tadqiqotlar va islohotlar markazi rahbariyati jurnalist va blogerlar bilan ko‘proq ishlab, ularning ilmiy savodxonligini oshirishni rejalashtirmoqda. Bu haqda 5-noyabr kuni bo‘lib o‘tgan matbuot anjumanida so‘z yuritildi, deya xabar bermoqda “Daryo” muxbiri.
“Tan olishimiz kerak, bizga o‘xshagan ilmiy-tadqiqot institutlari va akademik soha vakillari blogerlar, jurnalistlarning iqtisodiy bilimlarini oshirish bo‘yicha yetarli ish qilinmayotganligini ham ko‘rdik. Kecha markazimizga bir qancha blogerlar, radiokanallardan chiqib turli savollar berishdi. Afsuski, ko‘p odamlar intervyuni to‘liq ko‘rmay, fikr bildirmoqda, qanday tushunmovchiliklar bo‘lyapti. Blogerlar bilan ko‘proq ishlab, ularning ilmiy savodxonligini oshirish bo‘yicha ishlashni oldimizga maqsad ham qilib qo‘ydik. Ular bilan bitta notada bo‘lish uchun birga ishlashimiz kerak. Shuni alohida qayd etish joizki, bir tomondan odamlar mavzuga befarq emas ekan. Bu yo‘lda yana qancha ish qilishimiz kerakligi bo‘yicha rejalarimizni to‘g‘rilab oldik”, — dedi Obid Hakimov.
Hakimov bloger va jurnalistlarni populizmga berilmaslikka chaqirib, ular bilan yaqin hamkorlikda ishlashga tayyorligini bildirdi.
“Aytish kerakki, O‘zbekiston iqtisodiy soha bo‘yicha ham o‘zining aniq siyosatini amalga oshirib kelyapti. Ammo oxirgi paytlarda ba’zi jurnalistlar, blogerlar tomonidan populizmga berilish, har xil asoslanmagan chiqishlar qilinayotganini ham ko‘rib turibmiz.
Kuni kecha Toshkentdagi Vestminstr xalqaro universitetida o‘tkazilgan tadbirda taniqli rus iqtisodchisi Sergey Guriyevning populizm haqidagi ilmiy maqolasini muhokama qiluvchi sifatida qatnashdim. Maqolada populizm iqtisodiy rivojlanishga qanchalik salbiy ta’sir ko‘rsatilishi aytilyapti. Tadqiqotlarga asosan, 95 foiz YaIM ishlab chiqariladigan 60 ta eng katta mamlakatda populistik kayfiyat ko‘payganida uzoq muddatda, keyingi 10-15 yil ichida YaIMning 10 foizlar atrofida farq qilishi, ya’ni past bo‘lishi aytilyapti.
Bu narsa nimaga olib keladi? Yanada asoslanmagan qarorlarning qabul qilinishi va boshqa narsalarga olib keladi. Shu orqali davlatimiz rahbari aniq belgilab bergan, og‘ishmay ketayotgan yo‘limizda odamlarni sal chalg‘itishi mumkin. Shuning uchun biz sizlar bilan doim hamkorlik qilishga tayyormiz. Berilayotgan materiallaringizni ilmiy asoslar orqali tayyorlash bo‘yicha qanday yordam kerak bo‘lsa, biz yordam berishga har doim tayyormiz.
Kecha ham ijtimoiy tarmoqlarda agressiv tonning mavjudligini ko‘ryapsiz. Bu narsa hech qachon bizning rivojlanishimiz, konstruktiv muloqot qilishimizga foyda bermaydi. Biz har doim konstruktiv muloqot tarafdori bo‘lib qolamiz”, — dedi Iqtisodiy tadqiqotlar va islohotlar markazi direktori.
Izoh (0)