Odatda ijtimoiy tarmoq faollari va blogerlar “Blogerlik — kasb”, deydi. Instagramʼda 300 mingdan ortiq kuzatuvchiga ega bo‘lgan Nozanin G‘afforova ham trend videolar hamda Instagram uchun videokontentlar yaratib, obunachilari bilan bo‘lishadi.
— Hozir blogerlik ham kasbga aylanib bo‘lgan. Men uchun ham, boshqa blogerlar uchun ham bu faoliyat — kasb. Blogerlikning ortidan pul topilyapti, non yeyilyapti.
Instagramʼda oldin turli yo‘nalishda ijod qilgan bo‘lsam, hozir tamoman boshqa yo‘nalishga o‘tganman. Eski, shlyager qo‘shiq va kliplarni o‘zimning talqinimda suratga olyapman. O‘zimning jamoam bor, ijodimiz yaxshi ketyapti, odamlar ham to‘g‘ri qabul qilyapti. Bu ham qaysidir maʼnoda parodiya janri. Maqsad — eski damlarni, 80—90-yillarni odamlarning yodiga solish. Mana shunday yangi yo‘nalishda ijod qilyapmiz, Xudo xohlasa, davomiy bo‘ladi, deydi aktrisa.
— Men o‘zimni bloger deb hisoblayman. Chunki professional aktrisa sifatida hali o‘zimni kashf qilganim yo‘q. Og‘iz ko‘pirtirib aktrisaman, deb aytishimga hali bor. Bloger sifatida bu sohani bilaman, blogerman, deya olaman. Obunachilar bilan qanday gaplashish, yangiliklarni qanday qilib qiziq yetkazib bera olish kerakligini bilaman. Aktrisalikda esa hali o‘zimning qirralarimni ocholmadim, deydi Nozanin.
Blogerlar aktyorlikka daʼvogarlik qilyapti, professional sanʼatkorlar esa Instagramʼga tobora kirib bormoqda. Nozanin G‘afforova bunga qanday fikrda?
— Hozir deyarli hech kim televizor ko‘rmay qo‘ygan, ko‘radiganlar ham juda oz. Shu sababli ham aktyorlar Instagramʼdagi ijodga kirib ketyapti. Zamon talabi shu bo‘lib qolgani uchun o‘zining kasbini Instagramʼga moslab, daromad topishyapti. Bu, albatta, zo‘r va to‘g‘ri ham. Hatto o‘zim ham qatnashgan loyihalarimni YouTubeʼdan tomosha qilaman, deydi u.
Suhbatni to‘liq holda quyidagi havola orqali tomosha qiling.
Izoh (0)