Farg‘ona viloyati Dang‘ara tumanida Majburiy ijro byurosi (MIB) yo‘l-transport hodisasi oqibatida vafot etgan shaxsning qonuniy vakiliga moddiy va ma’naviy zarar uchun sudda belgilangan pul miqdorini undirib berdi. Bu haqda “Daryo”ga MIB xabar qilmoqda.
Ma’lum qilinishicha, Majburiy ijro byurosi Dang‘ara tuman bo‘limi ish yurituviga 2020-yil 21-avgust kuni jinoyat ishlari bo‘yicha Dang‘ara tuman sudining 2020-yil 3-iyuldagi O.Ergashevga nisbatan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) bilan chiqarilgan hukm yuzasidan fuqaroviy da’vogar “Demand trans servis” MChJdan jabrlanuvchining qonuniy vakili E.Qodirov foydasiga 66 million 732 ming 616 so‘m moddiy va 20 million so‘m ma’naviy zarar undirish haqidagi ijro hujjati kelib tushgan.
Sodir etilgan yo‘l-transport hodisasi natijasida bir inson vafot etgan bo‘lsada moddiy javobgar shaxs hisoblangan “Demand trans servis” MChJ tomonidan dastlabki tergov va sud jarayonlarida ham moddiy zarar umuman to‘lab berilmagani aniqlangan.
Sud hujjati byuroning tuman bo‘limiga kelib tushgandan keyin javobgar “Demand trans servis” MChJning “Hamkor bank” Qo‘qon filialidagi hisob raqamiga inkasso topshiriqnomasi qo‘yilgach, jamiyat mansabdor shaxslari zararni qoplash harakatiga tushgan.
So‘ngra 2020-yil 27-oktabrda javobgar taraf undiruvchi E.Qodirovning plastik kartasiga 66 million 732 ming 616 so‘m moddiy va 20 million so‘m ma’naviy zarar jami 86 million 732 ming so‘m so‘m pul mablag‘lari to‘liq o‘tkazib berdi.
Ijro hujjati amalda to‘liq ijro qilinganligi sababli tamomlanib, sudga qaytarildi.
Avvalroq MIB farg‘onalik tadbirkorning buzilgan do‘koni uchun hokimiyatdan 148 million so‘m, Namanganda yo‘l-transport hodisasi jabrlanuvchisiga 75 million so‘m va Toshkent shahrida 126 million so‘mlik aliment pulini undirib bergani haqida xabar berilgandi.
Izoh (0)