Surxondaryoda YPX xodimlari dadasining Nexia rusumli mashinasini boshqarib ketayotgan 13 yoshli bolani to‘xtatdi. Bolakay bilan olib borilgan tushuntirish ishlari tasvirlangan video bilan IIV YHXBB axborot xizmati bo‘lishgan.
Videodan ko‘rish mumkinki, yo‘lda harakatlanib ketayotgan Nexia avtomobili yo‘l-patrul xizmati inspektorining talabi bilan to‘xtatilgan. Haydovchi o‘rindig‘ida esa voyaga yetmagan shaxs — maktabning 7-sinfida o‘qiydigan 13 yoshli yigit o‘tirgani aniqlangan.
Yigitchaning so‘zlariga ko‘ra, u qo‘shnisining ahvoli yomonlashib qolgani, bu vaqtda esa dadasi spirtli ichimlik ichgani sabab mashinani o‘zi boshqarishga majbur bo‘lgan.
Yo‘l-patrul xizmati xodimlari tomonidan o‘smirga haydovchilik guvohnomasini olmasdan turib mashina boshqarmaslik to‘g‘risida tushuntirish ishlari olib borilgan.
Avvalroq O‘zbekistonda 2020-yil yanvar oyidan sentabr oyigacha 4294 ta yo‘l-transport hodisasi sodir bo‘lgani to‘g‘risida xabar berilgandi. YTHlarning 1,7 foizi mast holda rulga o‘tirish oqibatida kelib chiqqan.
Izoh (0)