Xitoy va Janubiy Koreya bilan 2020-yilning 24-oktabr kuni savdo-iqtisodiy, investitsiyaviy, moliyaviy-texnik, transport va logistika hamda madaniy-gumanitar hamkorlikni mustahkamlash bo‘yicha belgilangan vazifalar ijrosi muhokama qilindi, deb xabar bermoqda Investitsiyalar va tashqi savdo vazirligi.

Foto: Investitsiyalar va tashqi savdo vazirligi

Xitoylik va koreyalik hamkorlar bilan amalga oshirilishi rejalashtirilgan qo‘shma loyihalarni qayta ko‘rib chiqish, ularni amalga oshirish tahlil qilindi. Hozirgi vaqtda amalga oshirish jadvalidan ortda qolayotgan bir qator loyihalar batafsil ko‘rib chiqildi, muammolarni bartaraf etishning aniq muddatlari hamda tegishli vazirlik va idoralar rahbarlariga shaxsiy javobgarlik belgilangan holda mavjud masalalarni hal qilish algoritmlari ishlab chiqildi.

Davlat rahbari tomonidan belgilangan vazifalarni amalga oshirishda yaqin idoralararo kooperatsiyani tashkil etish zarurligi ta’kidlandi. Shu munosabat bilan tegishli vazirlik va idoralarning tarkibiy bo‘linmalari rahbarlaridan iborat maxsus ishchi guruhini tuzish to‘g‘risida topshiriq berildi.

Foto: Investitsiyalar va tashqi savdo vazirligi

Mazkur ishchi guruhning vazifasi xitoylik va koreyalik hamkorlar bilan loyiha va tashabbuslarni implementatsiya qilishni jadallashtirish bo‘yicha amaliy ishlarni olib borish bo‘ladi.

Xitoydan olib kirilayotgan yillik investitsiyalar hajmini 2025-yilga borib 5 milliard dollarga, Janubiy Koreyadan esa 1 milliard dollarga yetkazish rejalashtirilgan. Shu bilan birga, 2025-yilga borib Xitoyga amalga oshiriladigan yillik eksport hajmi kamida 3 milliard dollarni, Janubiy Koreyaga esa kamida 800 million dollarni tashkil etishi kerak.

Foto: Investitsiyalar va tashqi savdo vazirligi

Foto: Investitsiyalar va tashqi savdo vazirligi

Muhokama yakunida mutasaddi rahbarlarga barcha qo‘shma loyihalarni o‘rganish, ularni jadal, sifatli va o‘z vaqtida amalga oshirishga qaratilgan yangilangan “yo‘l xaritalari”ni tayyorlash, shuningdek, kelgusi yil uchun yangi istiqbolli dasturlar ishlab chiqish bo‘yicha qo‘shimcha manzilli topshiriqlar berildi.