Shavkat Mirziyoyev 14 yil avval kanalizatsiya qudug‘idagi odamlarni qutqarish vaqtida halok bo‘lgan IIB xodimini mukofotladi
O‘zbekiston Prezidenti Shavkat Mirziyoyevning ichki ishlar organlari xodimlari kuni munosabati bilan bir guruh soha vakillarini mukofotlash to‘g‘risidagi farmoni bilan 2006-yilda kanalizatsiya qudug‘ida qolib ketgan ishchilarni qutqarish vaqtida halok bo‘lgan Oybek Nishonov “Jasorat” medali bilan mukofotlandi.
Sirdaryo viloyati Ichki ishlar boshqarmasining ekspertiza va kriminalistika bo‘linmasi sobiq eksperti Oybek Nishonov 2006-yilda sodir bo‘lgan baxtsiz hodisa oqibatida vafot etgan.
Ma’lumotlarga ko‘ra, 2006-yil 16-may kuni Sirdaryo viloyati Yangiyer shahridagi “Suvoqova” korxonasining uch nafar ishchisi kanalizatsiya stansiyasi nasosini ta’mirlash maqsadida 6 metr chuqurlikdagi quduqqa tushgan va quduq ichida to‘planib qolgan o‘ta xavfli gazdan zaharlanib vafot etgan. Shuningdek, yana ikki kishi jabrdiydalarni qutqarish niyatida quduqqa tushishgan, biroq ular ham tezda hushidan ketgan.
Hodisa joyiga yetib kelgan katta leytenant Abdumutalib Qodirberdiyev o‘zining safdoshi, viloyat IIB ekspert-kriminalistika bo‘limiga bevosita bo‘ysunuvchi 2-sonli tumanlararo ekspertiza va kriminalistika bo‘linmasi eksperti, leytenant Oybek Nishonov bilan quduqqa tushib, uning ichida behush yotgan ikki fuqaroni qutqarishga muvaffaq bo‘lgan.
Shundan so‘ng ular “Suvoqova” korxonasining ishchilarini ham yuqoriga olib chiqishga harakat qilgan, biroq quduq ichida yig‘ilib qolgan zaharli gaz oqibatida IIBning ikkala xodimi ham vafot etgan.
“Postda” nashrining yozishicha, 2019-yilda ichki ishlar vaziri general-leytenant Po‘lat Bobojonov marhum Abdumutalib Qodirberdiyevning oilasiga “Mardlik” ordenini topshirgan.
Avvalroq Prezident farmoni bilan o‘z xizmat vazifasini bajarish vaqtida halok bo‘lgan ikki nafar YPX inspektori ham “Jasorat” medali bilan mukofotlangani to‘g‘risida xabar berilgandi.
