O‘zbekiston Prezidenti ichki ishlar organlari xodimlari kuni munosabati bilan bir guruh soha vakillarini mukofotlagani to‘g‘risida xabar berilgandi. Farmon bilan o‘z xizmat vazifasini bajarish vaqtida halok bo‘lgan ikki nafar ichki ishlar xodimi ham “Jasorat” medali bilan mukofotlandi.
Prezident farmoni bilan mukofotlanganlar orasida Toshkent shahar Ichki ishlar bosh boshqarmasining yo‘l harakati xavfsizligi boshqarmasi yo‘l-patrul xizmati sobiq inspektori marhum Salim Umarov ham bor. Shu yilning sentabr oyida YTH qurboniga aylangan inspektor “Jasorat” medaliga loyiq ko‘rilgan.
Eslatib o‘tamiz, Salim Umarov 1-sentabr kuni sodir bo‘lgan YTH oqibatida vafot etgandi. Uni Toshkentda 19 yoshli yigit Lacetti’da urib yuborgan va inspektor shifoxonaning reanimatsiya bo‘limiga yotqizilgan, keyinroq Umarov olingan tan jarohatlari oqibatida vafot etgan.
Shuningdek, 2020-yil 5-sentabr kuni YTH oqibatida vafot etgan Samarqand viloyatining Pastdarg‘om tumani IIB profilaktika inspektori Ravshan Boqiyev ham “Jasorat” medali bilan taqdirlangan.
Eslatib o‘tamiz, 1-sentabr kuni Pastdarg‘om tumani IIB profilaktika inspektori Ravshan Boqiyev tuman hududidan o‘tgan 4R-46 avtomobil yo‘lida xizmat o‘tayotgan vaqtida haydovchisi spirtli ichimlik ta’sirida bo‘lgan Damas avtomashinasi inspektor va 2 nafar fuqaroni urib yuborgan edi. Ko‘rsatilgan tibbiy yordamga qaramasdan IIB inspektori olingan tan jarohatlari oqibatida vafot etgan.
Ma’lumot uchun, Pastdarg‘om tumani ichki ishlar bo‘limida 6 yil xizmat qilgan Ravshan Boqiyev ichki ishlar tizimidagi faoliyatini 2014-yilda tuman IIB qo‘riqlash bo‘limida boshlab, 2017-yildan profilaktika inspektori vazifasida davom ettirgan.
Izoh (0)