Bugun,

  • USD 11095.31
  • RUB 173.84
  • EUR 10772.44

Hokim sifatida ish boshlagach birinchi maoshini ehtiyojmandlarga xayriya qilgan Qashqadaryo viloyatining G‘uzor tumani hokimi Bekzod Suyunov aholiga 55 ming so‘mdan go‘sht yetkazib bermoqchi bo‘lgan tadbirkordan narxni yanada arzonlashtirishni so‘radi. Bu haqda Xalq deputatlari G‘uzor tumani Kengashining navbatdagi sessiyasida so‘z bordi, deya xabar berdi “Daryo” muxbiri.

Bekzod Suyunov

Bekzod Suyunov
Foto: “Daryo”

Ma’lum bo‘lishicha, 2020-yil 22-oktabr kuni Xalq deputatlari G‘uzor tuman Kengashining navbatdagi sessiyasi bo‘lib o‘tgan. Sessiyada so‘z olgan tuman hokimi Bekzod Suyunov tumanda oziq-ovqat narxini barqarorlashtirish uchun qilinayotgan ishlar haqida ma’lumot bergan.

Hokimning ta’kidlashicha, tumanda 206 mingdan ortiq aholi istiqomat qiladi. Joriy yilning o‘tgan to‘qqiz oyida shuncha aholiga 21,8 ming tonna go‘sht, 60 ming tonna sut, 19,4 million dona tuxum, 1,9 ming tonna kartoshka, 17,0 ming tonna sabzavot, 7,8 ming tonna poliz mahsulotlari, 5,2 ming tonna meva yetkazib berilgan.

Foto: “Daryo”

Shuningdek, tumanda 40 gektar joyda issiqxonalar tashkil etilgan bo‘lib, ulardan olinayotgan mahsulotlarni sifatli saqlash uchun 5200 tonna sig‘imga ega 4 ta sovutgich hamda 1325 tonnalik 3 ta ombor faoliyati yo‘lga qo‘yilgan.

“Mahsulotlar savdosi uchun tumandagi 2 ta bozorda va 23 ta aholi gavjum maskanlarda arzonlashtirilgan mahsulotlar yarmarkalari tashkil qilinmoqda. Shuningdek, tumanimizda ham muhtaram Prezidentimiz tashabbusi bilan tashkil etilayotgan ‘Oziq – ovqat xavfsizligi’ jamg‘armasi hisobidan aholini oziq-ovqat va qishloq xo‘jaligi mahsulotlari bilan uzluksiz ta’minlash, bozorlarda narx-navoning keskin oshishining oldini olish maqsadida katta xaridlarni amalga oshirayotgan tadbirkorlarga foizsiz kreditlar ajratilmoqda”, — dedi tuman hokimi Bekzod Suyunov.

Foto: “Daryo”

Sessiya davomida so‘z olgan tadbirkor Hamza Toshtemirov tuman aholisini arzon go‘sht bilan ta’minlashini aytib, jamg‘arma hisobidan qo‘llab-quvvatlansa, mol go‘shtini 55 ming so‘mdan yetkazib berishni ma’lum qilgan. Tadbirkor tashabbusiga javob bergan hokim esa, unga Belorussiyada muzlatilgan go‘sht olib kelishni yo‘lga qo‘ysa, aholiga go‘shtni yanayam arzon yetkazib berishi mumkinligini aytgan.

“Belorussiyadan muzlatilgan go‘sht olib kelishni yo‘lga qo‘ysangiz, o‘sha muzlatilgan mol go‘shtini aholiga 45 ming so‘mdan sotasiz. Shu narx barcha xarajatlaringizni qoplab, daromad qilishingizga ham yetadi. Men barchasini hisob-kitob qilib ko‘rdim. Belorussiyadan keltirilgan muzlatilgan go‘sht shu narxda sotilsa ham, qoplaydi. Bozorga muzlatilgan go‘shtni olib chiqib, 45 ming so‘mdan sotsangiz, sizga raqobatchi bo‘layotganlar ham go‘shtini 55-60 ming so‘mdan oshirib yubormaslikka harakat qiladi. Qolaversa, bozorda 45 ming so‘mlik go‘sht ham bo‘lsa, qimmat go‘shtga qurbi yetmagan fuqaro 60 ming so‘mlik emas, 45 ming so‘mlik go‘shtdan sotib olib, iste’mol qiladi”, — degan hokim.

Foto: “Daryo”

Hokimning qo‘shimcha qilishicha, tadbirkor Hamza Toshtemirov tumanga Qozog‘istondan mol olib kelib, aholiga sifatli go‘sht yetkazib berish bilan shug‘ullanadi. Hokim bilan muloqot qilgan tadbirkor Belorussiyadan go‘sht olib kelishni yo‘lga qo‘yishini ma’lum qildi.

Eslatib o‘tamiz, avvalroq dehqonobodlik tadbirkor Qarshi aholisini arzon go‘sht bilan ta’minlashga va’da bergandi. Tadbirkor tashabbusini qo‘llab-quvvatlagan viloyat rahbari Zoir Mirzayev esa tadbirkorga yordam berish uchun foizsiz 1 milliard so‘m kredit berishi mumkinligini ma’lum qilgandi.

Izoh
Asosiy yangiliklar
Mahalliy
AOKA “Human.uz” jurnalistlari bilan bog‘liq holat yuzasidan munosabat bildirdi 
Mahalliy
O‘zbekistonda chiqindi gazidan elektr ishlab chiqarish yo‘lga qo‘yiladi 
Dunyo
Putin yo‘qotishlarga qaramay, bahorda Ukrainaga qarshi yangi hujumni rejalashtirmoqda — Bloomberg