2019-yil 4-sentabr kuni O‘zbekiston Respublikasi Prezidenti Shavkat Mirziyoyev raisligida yurtimizda jismoniy tarbiya va sportni rivojlantirish, xalqaro musobaqalarga tayyorgarlikni kuchaytirish masalalariga bag‘ishlab o‘tkazilgan videoselektor yig‘ilishida vazirliklar, idoralar va xo‘jalik birlashmalari hamda hududlardagi yirik korxona va tashkilotlar xodimlari o‘rtasida turli ommaviy madaniy va sport tadbirlari, jumladan “Bosh vazir kubogi”, “Hokim kubogi”, “Rahbar” kubogi musobaqalarini o‘tkazish vazifasi yuklatilgan edi.
Yurtboshimizning ushbu topshiriqlari ijrosini ta’minlash maqsadida Jismoniy tarbiya va sport vazirligi O‘zbekiston futbol assotsiatsiyasi bilan hamkorlikda joriy yil 4—12-oktabr kunlari vazirliklar, idoralar, xo‘jalik birlashmalari, yirik korxona va tashkilotlarning markaziy apparati xodimlari o‘rtasida “Bosh vazir kubogi-2020” futbol musobaqalarini yuqori saviyada tashkil etdi. Endi esa 22—30-oktabr kunlari ilk marotaba futbol bo‘yicha “Jismoniy tarbiya va sport vaziri kubogi” musobaqasi o‘tkaziladi.
Ushbu musobaqaning “Bosh vazir kubogi”dan farqli jihatlari nimada?
“Jismoniy tarbiya va sport vaziri kubogi” musobaqasida jamoalar maydonda 8 kishidan harakat qiladi va o‘yin maydonining yarmida to‘p tepishadi, zaxiradan 7 kishi joy oladi.
Shuningdek, bu musobaqada vazirliklar, idoralar, xo‘jalik birlashmalari, yirik korxona va tashkilotlarning faqat markaziy apparati xodimlari emas, balki tizimdagi tashkilotlardan ham havaskor futbolchilar jamoa tarkibiga jalb etilishi mumkin. Bundan ko‘zlangan maqsad, korxona-tashkilotlar markaziy apparatida xodimlar kamligi sababli chetdan professional yoki yarim professional jamoalarda to‘p tepayotgan futbolchilarni jalb etishining oldini olishdir. Ya’ni, musobaqada havaskor maqomiga ega, avvalo sog‘ligini o‘ylab yuguradigan xodimlar ishtirok etishsin.
Qolaversa, “Jismoniy tarbiya va sport vaziri kubogi” musobaqasida professional faoliyatini yakunlaganiga kamida besh yil bo‘lmagan hamda ishga qabul qilinganiga kamida bir yil to‘lmagan xodimlar qatnashishiga ruxsat berilmaydi. Bu ham musobaqaning halol, shaffof va adolatli o‘tishiga xizmat qiluvchi omillardan.
16-oktabr kuni Jismoniy tarbiya va sport vazirligi binosida ushbu musobaqa tashkiliy qo‘mitasining yig‘ilishi bo‘lib o‘tadi. Yig‘ilishda yana bir qator muhim masalalar o‘z yechimini topadi.
Hozirgacha “Jismoniy tarbiya va sport vaziri kubogi” musobaqasida ishtirok etish uchun 40 ta tashkilotdan talabnoma kelib tushgan. Talabnomalarni topshirishning so‘nggi muddati etib 2020-yilning 20-oktabr sanasi belgilangan. Qur’a tashlash marosimi esa 21-oktabr kuni o‘tkaziladi. Shoshiling, musobaqa boshlanishiga oz vaqt qoldi.
Musobaqa nizomi bilan quyida tanishishingiz mumkin:
Jismoniy tarbiya va sport vazirligi
Matbuot xizmati
Reklama huquqi asosida
Izoh (0)