Xalqaro kosmik stansiya kosmik chiqindi sabab o‘z orbitasini o‘zgartirishga majbur bo‘ldi

Parvozlarni boshqarish markazi 3-iyul kuni kechasi Xalqaro kosmik stansiyaning (XKS) kosmik chiqindi bilan to‘qnashuvining oldini olish uchun uning orbitasiga rejadan tashqari o‘zgartirish kiritdi, deb xabar beradi “Roskosmos”.

Manyovrni amalga oshirish uchun XKSning Rossiya segmentiga biriktirilgan “Progress MS-14” yuk kemasi dvigatellaridan foydalanilgan.

Dvigatel stansiya harakatini soniyasiga 0,5 metrga tezlashtirgani sabab XKS orbitasining balandligi 900 metrga oshgan.

“Roskosmos”ning ma’lum qilishicha, Xalqaro kosmik stansiyadagi kosmonavtlar Anatoliy Ivanishin va Ivan Vagner, shuningdek, astronavtlar Kristofer Kessidi, Duglas Xyorli va Rober Benken rejalashtirilgan dastur bo‘yicha ish olib bormoqda.

Ma’lumotlarga ko‘ra, 2020-yilning boshida Yer orbitasida 700 mingga yaqin kosmik chiqindi bo‘lgan. Gap kattaligi bir santimetrdan oshiqroq obyektlar haqida ketmoqda. 2019-yilning yanvarida esa Yer orbitasidagi kosmik chiqindilar hajmi 7 ming tonnaga yetgani to‘g‘risida xabar berilgandi.

Eslatib o‘tamiz, amerikalik astronavtlar Duglas Xyorli va Rober Benken 31-may kuni birinchi bor SpaceX’ning Crew Dragon kemasi orqali Xalqaro kosmik stansiyaga uchirilgan edi.