Armaniston hukumati Tog‘li Qorabog‘da nizolar kuchayishi tufayli 27-sentabr kuni joriy qilingan harbiy holat rejimini qat’iylashtirdi, deb xabar bermoqda “RBK”.
Xususan, Armanistonning mudofaa qobiliyatini, shuningdek, harbiy holatning huquqiy rejimini ta’minlovchi hukumat harakatlarini tanqid qilish taqiqlandi.
“Armanistonning mudofaa qobiliyatiga va xavfsizligiga putur yetkazuvchi tashviqot man qilinadi”, — deyiladi “Sputnik Armaniston” xabarida. Yangi qoidalarga rioya qilinishi ustidan politsiya nazorat olib boradi.
Avvalroq Rossiya prezidenti Vladimir Putin Tog‘li Qorabog‘dagi jangovar harakatlarni to‘xtatishga chaqirib, Armaniston va Ozarbayjon TIV rahbarlarini Moskvaga muzokaralar olib borish uchun taklif qilgan edi.
Tog‘li Qorabog‘da keng qamrovli jangovar harakatlar 27-sentabrdan buyon davom etmoqda. Bu mintaqadagi so‘nggi o‘n yillikda kuzatilgan eng jiddiy to‘qnashuv bo‘lmoqda.
8-oktabr kuni Jenavada Yevropada xavfsizlik va hamkorlik tashkilotining Minsk guruhi hamraislari — Rossiya, AQSh va Fransiya Tog‘li Qorabog‘dagi nizoni hal qilish bo‘yicha muzokaralar o‘tkazishni boshladi. Unda Ozarbayjon TIV rahbari Jayhun Bayramov ham qatnashdi.
Izoh (0)