O‘zbekiston 2020-yilning 8 oyi davomida 11 ta xorijiy davlatga qiymati 11,5 million dollarga teng bo‘lgan dori-darmon eksport qildi. Bu haqda Davlat statistika qo‘mitasi xabar berdi.

Foto: “Daryo”

Ma’lum qilinishicha, bu ko‘rsatkich 2019-yilning mos davriga nisbatan 8,5 million dollariga yoki qariyb 4 baravarga oshgan.

Davlat statistika qo‘mitasi ma’lumotlariga ko‘ra, o‘tgan 8 oy mobaynida O‘zbekiston dori-darmon mahsulotlarini eng ko‘p eksport qilgan davlatlar qatoridan quyidagilar o‘rin olgan:

  • Qirg‘iziston — 3,4 million dollar;
  • Qozog‘iston — 2,1 million dollar;
  • Afg‘oniston — 1,5 million dollar;
  • Turkmaniston — 1,2 million dollar;
  • Tojikiston — 1,1 million dollar;
  • Turkiya — 956,7 ming dollar.

Shu bilan birga, O‘zbekiston 2020-yilning 8 oyi davomida 55 ta xorijiy davlatdan 565,2 million dollarlik dori-darmon import qilgan. Bu ko‘rsatkich 2019-yilning mos davriga nisbatan 6,8 million dollarga kam.

O‘zbekiston dori-darmon mahsulotlarini eng ko‘p import qilgan davlatlar qatoriga quyidagilar kirgan:

  • Hindiston — 102,9 million dollar;
  • Rossiya — 59,9 million dollar;
  • Ukraina — 46,1 million dollar;
  • Latviya — 46,0 million dollar;
  • Xitoy — 34,1 million dollar.

Eslatib o‘tamiz, Prezident Shavkat Mirziyoyev 18-sentabr kuni bo‘lib o‘tgan videoselektorda Toshkent shahri va viloyatlar hokimlariga kelayotgan qishdagi koronavirus bilan bog‘liq vaziyatga tayyorlanish, dori-darmon zaxirasini tayyorlash bo‘yicha ko‘rsatma bergandi.