“Bavariya” Yevropa Chempionlar Ligasi 2019/20-yilgi mavsumida 120 million yevrodan oshiq daromad qilishni o‘zi uchun kafolatladi.
Bu musobaqa tarixidagi rekord miqdor hisoblanadi. Avvalgi rekord 2019-yilda 117,73 million yevro ishlab topgan “Barselona”ga tegishli edi.
2019/20-yilgi mavsumi to‘lovlar tizimi quyidagicha ko‘rinish oldi:
- Guruh bosqichi: har bir g‘alaba uchun 2,7 million yevro (6 g‘alaba uchun — 16,2 million yevro);
- Guruh bosqichidan chiqish: 15,25 million yevro;
- 1/8 finalga chiqish: 9,5 million yevro;
- Chorak finalga chiqish: 10,5 million yevro;
- Yarim finalga chiqish: 12 million yevro;
- Finalga chiqish: 15 million yevro.
Shu bilan birga “Bavariya” Chempionlar Ligasining so‘nggi o‘n yillikdagi reytingida top-3 ga kirgani bois qo‘shimcha 33,24 million yevro bonusga ega bo‘ladi. Shuningdek, myunxenliklar telehuquqlardan 11,5 million yevro daromad qilgan.
Natijada klub 123 million yevro daromadni o‘zi uchun naqd qildi. Chempionlar Ligasidagi g‘oliblik sabab bu miqdor 130 milliongacha ko‘tarilishi mumkin.
“Bavariya” finalda 23 avgust kuni PSJga qarshi o‘ynaydi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)