A Seriya yo‘llanmasini qo‘lga kiritgan uchinchi jamoa ma’lum bo‘ldi

A Seriyaga yo‘llanma taqdim etuvchi pley-off finalida “Frozinone” va “Spetsiya” klublari o‘zaro bahs yuritdi.

Har ikki uchrashuv mezbonlarning minimal hisobdagi g‘alabasi bilan tugadi (1:0, 0:1) va ikki o‘yin natijasiga ko‘ra tenglik yuzaga keldi. Biroq “Spetsiya” B Seriya musobaqa jadvalida (3-o‘rin) “Frozinone”dan (8) yuqori o‘rinni qo‘lga kiritgani sabab A Seriya yo‘llanmasiga ega bo‘ldi.

“Spetsiya” 1906-yilda tashkil topgan bo‘lib, o‘z tarixida ilk bor A Seriyaga chiqdi.

1944-yilda A Seriya Ikkinchi jahon urushi sabab o‘tkazilmagan. Buning o‘rniga Shimoliy Italiya futbol klublari o‘rtasida Campionato Alta Italia musobaqasi o‘tkazilgan. Ushbu musobaqada “Spetsiya” g‘alaba qozonadi, biroq Italiya futbol federatsiyasi bu sovrinni A Seriya g‘olibligiga tenglashtirmaydi.

2002-yilda “Spetsiya”ga faxriy chempionlik unvoni beriladi, biroq bu hali ham norasmiy maqomni saqlab qolgan.

Avvalroq “Benevento” va “Krotone” jamoalari oliy divizionga yo‘llanmasiga ega bo‘lgandi.