Nukus shahrida O‘zbekiston Qahramoni Musa Yerniyazovning vafoti munosabati bilan ta’ziya marosimi bo‘lib o‘tdi. Unda Prezident Shavkat Mirziyoyev ishtirok etib, marhumning oila a’zolariga, xalqimizga chuqur hamdardlik bildirdi, deb xabar beradi Prezident matbuot xizmati.

Foto: Prezident matbuot xizmati

Shavkat Mirziyoyev Musa Yerniyazov qariyb 50 yillik faoliyati davomida ulkan rahbarlik qobiliyati, insoniy fazilatlari bilan hurmat qozongani, Qoraqalpog‘istonning iqtisodiy salohiyatini oshirish, shahar va ovullarni obod qilish, aholi turmushini yaxshilash uchun o‘zini ayamay mehnat qilganini ta’kidladi.

Foto: Prezident matbuot xizmati

“Qoraqalpoq zaminida, Orol halokati yuz bergan o‘lkada yashab mehnat qilish – bu haqiqiy matonat. Musa Yerniyazov ana shunday qahramon xalqning qahramon rahbari edi. U 18 yil davomida Qoraqalpog‘iston Respublikasi Jo‘qorg‘i Kengesining raisi deb atalmish o‘ta mas’uliyatli va sharafli vazifada samarali faoliyat olib borgani buni yaqqol tasdiqlaydi”, — dedi davlat rahbari.

Foto: Prezident matbuot xizmati

Musa Yerniyazov O‘zbekiston Respublikasi Oliy Majlis Senati raisining o‘rinbosari sifatida O‘zbekistonning barcha hududlarini rivojlantirish uchun muhim qonunlarni ishlab chiqish va amalga oshirishga katta hissa qo‘shgani yodga olindi.

Foto: Prezident matbuot xizmati

Foto: Prezident matbuot xizmati

“Alloh taolo Musa og‘ani mana shunday muborak Qurbon hayiti va juma kunlarida o‘z rahmatiga olganida ham bir xislat borligidan dalolat, deyish mumkin. Barchamiz uchun qadrli bu inson hayotda o‘zidan yaxshi nom, yaxshi iz va xotiralar qoldirdi. ‘Yurt uchun fido bo‘lish – o‘lim emas, aslida qayta tug‘ilish’, deydi donolar. Musa Yerniyazovning nomi va yorqin xotirasi ham bugun qayta tug‘ilmoqda, tarix sahifalariga abadiy muhrlanmoqda”, — deya ta’kidladi Shavkat Mirziyoyev.

Foto: Prezident matbuot xizmati

Qoraqalpog‘iston Respublikasi Vazirlar Kengashi raisi Qahramon Sariyev, Qoraqalpog‘iston Respublikasi Mahalla va oilani qo‘llab-quvvatlash vazirining o‘rinbosari, Oliy Majlis Senati a’zosi Sharap Usnatdinov, “Qoraqalpoq adabiyoti” gazetasi bosh muharriri, Oliy Majlis Senati a’zosi Guliston Annaqlicheva, Xorazm viloyati hokimi Farhod Ermanov, O‘zbekiston yoshlar ishlari agentligining Qoraqalpog‘iston bo‘limi rahbari, Oliy Majlis Senati a’zosi Abatbay Daniyarov Musa Yerniyazovning el-yurt manfaati yo‘lidagi serqirra faoliyati, odamlarga yaxshiliklarini esga oldi.

Foto: Prezident matbuot xizmati

“O‘zbekiston Respublikasi Oliy Majlis Senati a’zolari, Qonunchilik palatasi deputatlari, Prezident Administratsiyasi hamda Vazirlar Mahkamasi vakillari, Qoraqalpog‘iston Respublikasi Jo‘qorg‘i Kengesi deputatlari, Vazirlar Kengashi a’zolari va keng jamoatchilik marhum xotirasiga hurmat bajo keltirib, surati tagiga gullar qo‘ydi.

Qur’on tilovat qilindi.

O‘zbekiston Qahramoni, atoqli davlat va jamoat arbobi, samimiy va fidoyi inson Musa Tajetdinovich Yerniyazovning xotirasi xalqimiz qalbida doim saqlanib qoladi”, — deyiladi Prezident matbuot xizmati xabarida.

Foto: Prezident matbuot xizmati

Avvalroq Shavkat Mirziyoyev Musa Yerniyazovning qabrini ziyorat qilgani xabar qilingandi.

Eslatib o‘tamiz, Qoraqalpog‘iston Jo‘qorg‘i Kengesi raisi Musa Yerniyazovda 24-iyun kuni koronavirus aniqlangan. U Respublika ixtisoslashtirilgan Xirurgiya ilmiy-amaliy tibbiyot markazining Nukus filialiga yotqizilgan. Unga COVID-19 infeksiyasi o‘ta og‘ir kechishi, ikki tomonlama pnevmoniya tashxisi qo‘yilgan. Qoraqalpog‘iston SSV axborotiga ko‘ra, Musa Yerniyazov bir oy og‘ir ahvolda bo‘lgan. 31-iyul kuni esa Musa Yerniyazov vafot etdi.