Zangiotadagi “Nazarbek” sanatoriysi koronavirusga chalingan bemorlarni davolash kompleksiga aylantirildi
Respublika maxsus komissiyasining 2020-yil 28-iyuldagi 39-sonli qaroriga muvofiq Toshkent viloyati Zangiota tumanidagi “O‘zbekiston temiryo‘llari” aksiyadorlik jamiyati tasarrufidagi “Nazarbek” sanatoriysi 350 o‘ringa mo‘ljallangan koronavirusga chalingan bemorlarni davolash kompleksiga aylantirildi. Bu haqda tuman hokimligi axborot xizmati xabar berdi.
Qayd etilishicha, 2020-yil 31-iyul kuni mazkur davolash kompleksining ochilish marosimi bo‘lib o‘tdi. Bunda O‘zbekiston Milliy gvardiyasi qo‘mondoni general-mayor Jo‘rayev Rustam Mirzayevich, Toshkent viloyati hokimi Xolmatov Rustam Qurbonnazarovich, “O‘zbekiston temiryo‘llari” AJ tibbiyot xizmati boshlig‘i va boshqa mutasaddi tashkilot rahbarlari ishtirok etdi.
Mazkur kompleksda jami 350 ta o‘rin mavjud bo‘lib, shundan 8 tasi – o‘ta og‘ir bemorlar, 72 tasi – og‘ir bemorlar va 270 tasi yengil va o‘rta darajali bemorlarni davolash uchun mo‘ljallangan.
Bemorlarni davolashga jami 90 nafar tibbiyot xodimlari jalb qilingan. Bularning 24 nafari shifokorlar, 42 nafari hamshira, 13 nafari kichik tibbiyot xodimlari va 11 nafari xo‘jalik xodimlaridan iborat.
Hozirda davolash kompleksi zaruriy tibbiy texnika va anjomlar bilan to‘liq jihozlandi. Jumladan, 5 ta sun’iy nafas oldirish apparati, 45 ta oksigenerator, 100 ta Bobrov apparati, 1 dona portativ rentgen apparati, rentgen digizayter apparati, 1 ta EKG apparati, 25 dona pulsoksimetr, 4 ta funksional koyka, 3 dona kardiomonitor, 4 dona infuzomat, 1 dona laringoskop, 50 dona pirometr, 70 dona shtativ, 2 ta defibrillyator, 2 ta katalka, 2 ta kolyaska, 2000 dona himoya kombinezoni, 2000 dona niqob, 300 dona himoya ko‘z oynagi bilan jihozlangan
Davolash jarayoniga Toshkent tibbiyot akademiyasi kafedra mudiri, tibbiyot fanlari doktori, professor Teshayev Oktyabr Ruhillayevich bosh shifokor sifatida jalb etildi.
Bugungi kunda shifoxonada 350 nafar bemorni davolash uchun talab etiladigan 3 xil turdagi COVID-19’ga qarshi, bundan tashqari, 48 xil turdagi umumiy dorilar (pnevmoniyaga, qon bosimini tushirish, yo‘talni davolash va hokazo) zaxirasi jamlandi.
Davolash jarayonini samarali tashkil etish hamda ushbu jarayonda eng ilg‘or tajribalarni amaliyotga tatbiq etish maqsadida vrachlar uchun telemeditsina tizimi joriy etildi. Shifokorlar va Milliy gvardiya xodimlari 15 ta portativ radioaloqa vositalari bilan ta’minlandi.
Avvalroq Urganch shahrida koronavirus yuqtirib olgan bemorlarni davolash uchun 708 o‘rinli maxsus markazlar tashkil etilgani haqida xabar berilgan edi. Bundan tashqari Uchtepa tumanida joylashgan Atlas mebel markazida koronavirusga qarshi kurash doirasida navbatdagi taqsimlash markazi tashkil etilmoqda.
Ayni paytda Yunusobod tumanidagi “O‘zekspomarkaz”ning 3-pavilyonida 1000 o‘rinlik maxsus markaz faoliyat yuritmoqda (mas’ul – Toshkent shahar hokimligi). Shuningdek, 1 va 2-pavilyonlarda yana 814 ta koyka tayyorlanmoqda (mas’ul – Mudofaa vazirligi gospitali).
Bundan tashqari, yaqin 2-3 kun ichida Yunusoboddagi gimnastika saroyida 750 o‘rinli (mas’ul – IIV gospitali), Shayxontohur tumanidagi “Yoshlik” sport majmuasida 520 o‘rinli (mas’ul – DXX gospitali) birinchi tibbiy yordam markazlari foydalanishga topshirilishi kutilyapti.
Sergeli tumanidagi 2-son BO‘SM 250 o‘rinli davolash maskani etib qayta jihozlanyapti.
Bundan avval O‘zbekiston davlat jahon tillari universiteti yotoqxonasi va Chilonzor tumanidagi Cardio Star Plus xususiy klinikasi (50 ta o‘rin) ham koronavirusga gumon qilinganlarni vaqtincha saqlash maskanlariga aylantirilgani aytilgandi.
