Buxoroda koronavirus asoratlari oqibatida 68 yoshli ayol vafot etdi. Bu haqda Sog‘liqni saqlash vazirligi xabar berdi.
Ma’lum qilinishicha, Buxoro shahrida yashagan 68 yoshli M.M. da 11-iyul kunidan tana harorati ko‘tarilgan va uy sharoitida davolangan. 17-iyul kuni esa og‘ir ahvolda shifoxonaga olib kelinib, reanimatsiya bo‘limiga yotqizilgan.
Unga COVID-19 infeksiyasining o‘ta og‘ir kechishi, ikki tomonlama pnevmoniya tashxisi qo‘yilgan.
Xastalik o‘tkir nafas yetishmovchiligi asorati bilan kechgan. Shuningdek, bemor qandli diabet, yurak ishemik kasalligi, zo‘riqish stenokardiyasi, gipertoniya, arterial gipertenziya kabi hamroh kasalliklar bilan ham og‘rigan. Shifoxonada bemorning davolanishi davomida shifokorlar tomonidan konsultatsiya va konsiliumlar qilingan, davolash jarayoni mutaxassislar tavsiyasi asosida olib borilgan.
Biroq shifokorlar tomonidan standartlar asosida o‘tkazilgan reanimatsion muolajalarga qaramasdan bemorning ahvoli keskin og‘irlashib, o‘tkir nafas va yurak qon-tomir yetishmovchiligidan vafot etgan.
Sog‘liqni saqlash vazirligi hisobiga ko‘ra, 68 yoshli M.M. koronavirusning 132-qurboniga aylandi.“Daryo” hisobi bo‘yicha koronavirusga chalingach, vafot etganlar soni 138 nafarni tashkil etmoqda.
Avvalroq Qoraqalpog‘iston Respublikasi Taxtako‘pir tumani shifoxonasining 32 yoshli tez tibbiy yordam hamshirasi 28-iyul kuni koronavirusdan vafot etgani to‘g‘risida xabar berilgandi.
