Quyida e’tiboringizga havola etmoqchi bo‘lgan yulduzlar ko‘p go‘sht yeyish tugul, hayvon go‘shtidan qilinadigan mahsulotlarni ham iste’mol qilmaydi. Ularning atrof-muhit va hayvonot olamini saqlashga o‘z hissasini qo‘shishni istashi hamda sog‘lom turmush tarziga rioya qilishi sabab bo‘lgan.
Beyonse
Beyonse o‘simlik parheziga amal qiladiganlardan. Xonanda 2018-yilda, ijtimoiy tarmoqlarda muxlislariga, Coachella festivalida chiqish qilishga tayyorlanish arafasida vegan bo‘lganini ma’lum qilgan. Qo‘shiqchining tashqi ko‘rinishiga nazar tashlab, ushbu parhez unga yaxshi ta’sir qilganini bilish mumkin.
Malika Beatris
Qirollik oilasi vakillaridan bo‘lgan malika Beatris, 2019-yilda 31 yoshga to‘lishi munosabati bilan vegan parheziga asoslangan ziyofat tashkil qilgan. Bunda unga professional oshpazlar yordam bergan va ziyofat dasturxonidan vegancha 30 xil taom o‘rin olgan. Hatto, tug‘ilgan kun torti ham sut mahsulotlari va tuxumsiz tayyorlangan.
Mayli Sayrus
Mayli 2014-yilda barcha turdagi go‘sht mahsulotlarini iste’mol qilmaslikka qaror qilgan. Agar ekologiyani asrash uchun bunday yo‘l tutgan bo‘lsa tasanno, ammo sog‘lom turmush tarzi uchun ushbu parhezni tanlagan bo‘lsa, unda veganlik logosini tanasiga o‘yib tushirganida salomatlik bilan bog‘liq mantiqqa nima bo‘lgan, ajablanadi kishi.
Natali Portman
Aktrisa 10 yoshida vegaterian, 11 yoshida esa vegan bo‘lgan. U bergan intervyularida, ko‘pchilik veganlar ustidan kulishini, lekin u atrof-muhit, tabiatga befarq bo‘lmaslik, ularni asrash, ekologik muammolar haqida bosh qotirish muhim deb o‘ylashini ta’kidlagan.
Benedikt Kamberbetch
Sherlok Holmes rolini mahorat bilan ijro qilgan Benedikt ham mashhur veganlardan. YouTube yulduzi Greys aktyorga, qachondir Londonning eng zamonaviy restoranida ovqatlanishingiz mumkinmi, deb bergan savoliga Kamberbetch: “Ha, faqat menyuda vegan taomlari bo‘lsa”, — deb javob bergan. 2016-yilda aktyor GQ jurnalining bosh sahifasida, dunyodagi ilk vegan erkaklar brendi bo‘lgan Brave GentleMan’ning etik va kostyumida suratga tushgan.
Izoh (0)