Qozog‘iston prezidenti Qosim-Jo‘mart To‘qayev mamlakat hukumati oldiga “pandemiya borasidagi statistikani to‘g‘irlash” vazifasini qo‘ydi, deb xabar beradi Tengrinews.
Qozog‘iston prezidentining ta’kidlashicha, mamlakatda koronavirusdan tashqari pnevmoniya ham fuqarolar hayotiga jiddiy xavf tug‘dirmoqda.
“Pandemiyaga bog‘liq barcha ma’lumotlar, u qanchalik qayg‘uli bo‘lmasin, jamiyat mulki bo‘lishi kerak. Shaffoflik va o‘zaro ishonch qancha ko‘p bo‘lsa, ushbu hamlani shunchalik tez yengamiz”, — deb yozadi To‘qayev o‘zining Twitter’dagi sahifasiga.
Avvalroq Qozog‘iston prezidenti Qosim-Jo‘mart To‘qayev mamlakatda koronavirusning ikkinchi to‘lqini boshlanganini e’lon qilgan edi va bunda Sog‘liqni saqlash vazirligini ayblagandi. Qozog‘istonda karantin cheklovlari iyul oyining oxirigacha uzaytirildi.
So‘nggi ma’lumotlarga ko‘ra, Qozog‘istonda koronavirusga chalinganlar soni 66 895 kishiga yetgan. Hozirga qadar mamlakatda 40 256 bekor sog‘aygan, 396 kishi COVID-19 qurboniga aylangan.
Izoh (0)