Qirg‘izistonda o‘tgan bir sutkada koronavirusdan 2 kishi, pnevmoniyadan 45 kishi vafot etdi, 421 kishida koronavirus aniqlandi

Qirg‘izistonda o‘tgan bir sutka ichida ikki kishi koronavirusdan, yana 45 kishi — pnevmoniyadan vafot etdi, deya ma’lum qildi SSV jamoat salomatligi boshqarmasi boshlig‘i Aynur Akmatova.

Sog‘liqni saqlash vazirligi ma’lumotlariga ko‘ra, koronavirusdan vafot etgan bemorlarning biri 58 yoshli erkak bo‘lsa, ikkinchisi — 67 yoshli ayol. Hozirda butun mamlakat bo‘ylab koronavirus qurbonlari soni 149 kishiga yetgan.

Shuningdek, o‘tgan bir sutkaning o‘zida Qirg‘izistonda 45 kishi pnevmoniyadan vafot etgan. Qurbonlarning 22 nafari Bishkek shahri hisobiga to‘g‘ri kelmoqda, yana 23 kishi esa — respublikaning boshqa hududlarida. Mamlakatda 2020-yilning martidan buyon pnevmoniyadan vafot etganlar soni 497 kishiga yetdi.

14-iyul holatiga ko‘ra, Qirg‘izistonda yana 421 kishida koronavirus aniqlangan. Koronavirusga chalingan yangi kasallarning 176 nafari Bishkek shahri hisobiga to‘g‘ri kelmoqda. Shuningdek, quyidagi hududlarda ham koronavirus bilan kasallanish bo‘yicha yangi holatlar qayd etilgan:

• Chuy viloyati — 87;
• O‘sh shahri — 58;
• O‘sh viloyati — 6;
• Issiqko‘l viloyati — 31;
• Jalolobod viloyati — 40;
• Norin viloyati — 1;
• Botken viloyati — 21;
• Talas viloyati — 1.

Avvalroq 9-iyulda Qirg‘iziston bosh vaziri barcha tibbiyot xodimlarini ta’tildan chaqirib olishni buyurgani, 10-iyulda Qirg‘iziston sog‘liqni saqlash vazirida pnevmoniya, uning o‘rinbosarida koronavirus aniqlangani, Bishkekdagi tez yordam xodimlarining chorak qismi COVID-19 va pnevmoniya bilan kasallangani to‘g‘risida xabar berilgandi.