“Navbahor” futbolchilarida koronavirus aniqlanmadi. Klub 9-tur o‘yinini o‘z vaqtida o‘tkazadi

“Bunyodkor” futbol klubi o‘yinchilaridan biri koronavirus infeksiyasini yuqtirib olganlikda gumon qilingani uchun Coca-Cola Superliganing 9-turidan o‘rin olgan “Buxoro” — “Bunyodkor” uchrashuvi noma’lum muddatga qoldirilgandi.

Shundan so‘ng, O‘zbekiston professional futbol ligasi (PFL) ehtiyotkorlik yuzasidan 8-turda “Bunyodkor” bilan kuch sinashgan “Navbahor ”futbolchilarining ham tibbiy tekshiruvdan o‘tishini so‘ragan.

PFLning ma’lum qilishicha, “Navbahor” futbol klubi 13-iyul kuni tibbiy xulosalar biriktirilgan rasmiy xatni tashkilotga taqdim etgan. Unga ko‘ra, “Navbahor” futbolchilarida infeksiya aniqlanmagan.

Shundan kelib chiqib, klubning 9-tur doirasidan o‘rin olgan “Qizilqum”ga qarshi uchrashuvi o‘z vaqtida bo‘lib o‘tadi.

Mazkur bellashuv 13-iyul kuni soat 20:00 da boshlanadi.