AQSh prezidenti “Rossiya ishi” bo‘yicha sudlangan do‘sti va maslahatchisi Rojer Stounga belgilangan jazoni yengillashtirdi

AQSh prezidenti Donald Tramp yolg‘on ko‘rsatma berishda ayblangan qadrdon do‘sti va maslahatchisi Rojer Stounga belgilangan jazoni yengillashtiruvchi qarorni imzoladi. Bu haqda Oq uy saytida ma’lum qilindi.

“Rojer Stoun yetarli darajada jabr ko‘rdi. Unga nisbatan ushbu ishga aloqador boshqalar kabi juda adolatsiz munosabatda bo‘lindi. Rojer Stoun endi ozod inson!”, — deyiladi Oq uy bayonotida.

Gap afv haqida emas, qamoq muddatini qisqartirish haqida ketmoqda. Shunday qilib, 67 yoshli Rojer Stounning sudlanganligi bekor bo‘lmaydi, biroq u endi jazoni o‘tashi shart emas.

Tramp bu kabi qarorni apellyatsiya sudi Stounning 40 oylik qamoq muddati boshlanishini kechiktirish to‘g‘risidagi arizasini rad etganidan so‘ng qabul qilgan. Stoun 14-iyul kuni qamoqxonaga yetib kelishi kerak edi.

AQSh Demokratlar partiyasi vakillari Trampning ushbu harakatini “qonun ustuvorligiga tajovuz qilish” deb atamoqda.

Fevral oyida Rojer Stoun yolg‘on ko‘rsatma berish, guvohga bosim o‘tkazish va Kongress tergoviga xalaqit berishga aybdor deb topilgandi. Unga nisbatan ayblov Rossiyaning 2016-yili AQShda bo‘lib o‘tgan prezidentlik saylovlariga aralashuvini tergov qilgan maxsus prokuror Robert Myuller tomonidan e’lon qilingan. Dastlab Stounga 7 yildan 9 yilgacha qamoq jazosiga hukm qilish so‘ralgan. Tramp o‘zining Twitter’ida bu tavsiyani tanqid qilib, taklif qilingan hukmni “dahshatli va insofsiz” deb aytgan edi.