Jizzax shahrida karantin talablari kuchaytirildi. Barcha savdo shoxobchalari, choyxona, kafe va restoranlar yopiladi

Koronavirus infeksiyasi tarqalishining oldini olish maqsadida Jizzax shahrida karantin talablarini kuchaytirish to‘g‘risida Jizzax viloyat hokimi Ergash Soliyevning qarori qabul qilindi. Bu haqda viloyat hokimligi matbuot xizmati xabar berdi.

Unga ko‘ra, viloyat hududida so‘nggi kunlarda koronavirus infeksiyasiga chalingan bemorlar soni ortib borayotgani, ayrim tumanlar “qizil” toifali hududlar tarkibiga kiritilgani inobatga olinib, viloyat shtabi qarorlariga muvofiq, Jizzax shahrida 4-iyul soat 00:01 dan boshlab karantin choralari kuchaytirildi.

Jizzax shahriga kirish va chiqishni nazorat qilish uchun qo‘shimcha yo‘l-patrul xizmati statsionar postlari va blokpostlari tashkil etiladi. Kiruvchi va chiquvchi shaxslarda koronavirus infeksiyasi alomatlarini aniqlash bo‘yicha majburiy tibbiy nazorat o‘rnatiladi.

Tashkil etilgan yo‘l-patrul xizmati statsionar postlari va blokpostlarni pirometrlar (masofadan tana haroratini o‘lchovchi) va o‘tishga ruxsat etilgan avtotransport vositalarining majburiy ravishda dezinfeksiya qilinishini ta’minlaydi.

Jizzax shahridagi “Yoshlar shaharchasi”, “Istiqlol” va “O‘rda” ekologik istirohat bog‘lari faoliyati to‘xtatiladi va fuqarolarning bog‘ hududiga kirishi taqiqlanadi.

Jizzax shahrida avtotransport vositalarining maxsus ruxsatnomasiz faqat kunning muayyan vaqtida soat 07:00 dan soat 10:00 gacha va soat 17:00 dan soat 20:00 gacha harakatlanishiga ruxsat etiladi.

Jizzax shahrida soat 07:00 dan 23:00 ga qadar jamoat joylarida uch kishidan ortiq to‘planish hamda soat 23:00 dan soat 07:00 ga qadar ko‘chalarda, ko‘p qavatli uylar va hovlilar oldida bo‘lish taqiqlanadi. Bunda faqatgina fuqarolarning salomatligi yomonlashgani munosabati bilan shifokor ko‘rigidan o‘tish uchun davolash muassasasiga yoxud zarur dori-darmon xarid qilish maqsadida dorixonaga borib-kelishiga shaxsiy transport vositasiga ruxsat beriladi.

Jizzax shahridagi Markaziy dehqon bozori hamda “Eski shahar dehqon” bozori, savdo majmualari (supermarket, minimarket va boshqalar) kirish-chiqish joylarida fuqarolarning tana haroratini o‘lchash uchun tegishli mutaxassislar pirometrlar va antiseptik vositalar bilan ta’minlanadi. Shuningdek, Jizzax shahriga boshqa hududlardan kirib kelayotgan barcha transport vositalari, tovar va yuklarning majburiy ravishda dezinfeksiya qilinishi ta’minlanadi.

Davlat idoralari va tashkilotlarida fuqarolar hamda tadbirkorlik subyektlari vakillarini qabul qilish, ularga davlat va boshqa xizmatlarni ko‘rsatish imkon qadar onlayn rejimga o‘tkaziladi. Jamoat joylari va tadbirkorlik faoliyati obyektlarida ijtimoiy masofa (2 metr) saqlash, uch kishidan ortiq yig‘ilmaslik, fuqarolarning tibbiy niqobdan hamda antiseptik vositalardan doimiy ravishda foydalanish, barcha tashkilotlar kirish-chiqish joylarini pirometrlar, antiseptik vositalar va dezinfeksion “to‘shak”lar bilan ta’minlash hamda xodimlar tomonidan ijtimoiy masofani saqlagan holda faoliyat yuritishini ta’minlash choralari ko‘riladi.

Jizzax shahridagi barcha savdo shoxobchalari, choyxona, restoran, kafe va boshqa umumiy ovqatlanish joylari, sartaroshxona va go‘zallik salonlari hamda o‘quv kurslari faoliyati karantin tadbirlari tugagunga qadar to‘xtatiladi.

Viloyat hududidagi yirik buyum bozorlari hamda buyum savdosi bilan shug‘ullanadigan yirik savdo majmualari haftaning shanba va yakshanba kunlari sanitariya-dezinfeksiya ishlarini amalga oshirish uchun yopiladi. Shuningdek, Jizzax shahridagi “Ko‘k bozor” dehqon bozori haftaning yakshanba, “Eski shahar dehqon” bozori haftaning har dushanba kuni yopiladi hamda belgilangan choralarga to‘liq rioya etilishi ustidan qat’iy nazorat o‘rnatiladi.

Ma’lumot uchun, O‘zbekistonda 7-iyul soat 10:00 holatiga ko‘ra, koronavirus infeksiyasi qayd etilganlar soni 10 459 nafarga yetdi. Shundan 6690 nafari sog‘aygan, 38 kishi virus oqibatlaridan vafot etgan, virus qurbonlarining ikki nafari 29 va 30-iyunda Jizzax viloyatida qayd etilgan.