Jizzaxda shahar hokimligi binosi karantinga olindi, deb xabar bermoqda hokimlik matbuot xizmati.
Qayd etilishicha, so‘nggi kunlarda Jizzaxda koronavirus infeksiyasining ko‘payganligi tufayli hududda virus tarqalishining oldini olish maqsadida yo‘llanma asosida shahar hokimi Akbar Shukurov topshirig‘i bilan hokimlik xodimlari COVID-19 testidan o‘tkazilgan.
O‘tkazilgan test natijalariga ko‘ra, Jizzax shahar hokimligi xodimlari va rahbariyatidan koronavirus infeksiyasi aniqlanmagan.
Ammo “Mahalla va oilani qo‘llab-quvvatlash markazi” Jizzax shahar bo‘limining 1 nafar xodimida COVID-19 infeksiyasi aniqlanganligi sababli “Mahalla va oilani qo‘llab-quvvatlash markazi” Jizzax shahar bo‘limi va shahar hokimligi binosi karantinga olingan.
Ayni paytda hokimlik xodimlari o‘z ishlarini masofadan turib davom ettirmoqda.
Ma’lumot uchun, O‘zbekistonda 7-iyul soat 10:00 holatiga ko‘ra, koronavirus infeksiyasi qayd etilganlar soni 10 459 nafarga yetdi. Shundan 6690 nafari sog‘aygan, 38 kishi virus oqibatlaridan vafot etgan, virus qurbonlarining ikki nafari 29 va 30-iyunda Jizzax viloyatida qayd etilgan.
Izoh (0)