Farg‘onada qarzdordan undirilishi lozim bo‘lgan, ammo bir yildan beri qidiruvga berilib topilmay kelayotgan Spark’ning daragi chiqdi, mashina sotib yuborilgan va yangi egasi uni deyarli haydamagan. Bu haqda MIBning Bag‘dod tuman bo‘limi “Daryo”ga ma’lum qildi.
Fuqarolik ishlari bo‘yicha Rishton tumanlararo sudining 2019-yil 3-apreldagi 6537-sonli ijro hujjatiga ko‘ra, qarzdor Q.B.ning noqonuniy egaligidagi Spark undiruvchi Toshkent shahri Uchtepa tumanida yashovchi T.Yusupovga olib berish belgilangandi. Mazkur ijro hujjati qarzdorning yashash manzili bo‘yicha Majburiy ijro byuroning Bag‘dod tuman bo‘limiga kelib tushgan.
Majburiy ijro harakatlari davomida qarzdor Q.B.ning yashash uyi ko‘zdan kechirilgan, biroq transport vositasi aniqlanmagan va ijro hujjati talabini bajarmaganligi sababli unga Ma’muriy javobgarlik to‘g‘risidagi kodeksining 198-(1) moddasiga asosan 1 million 115 ming so‘m ma’muriy jarima jazosi qo‘llanilgan.
Ijro hujjati bo‘yicha 2019-yil 9-may kuni mazkur transport vositasiga nisbatan qidiruv e’lon qilingan va qidiruv guruhi xodimlari tomonidan YHXB xodimlari bilan hamkorlikda olib borilgan tadbirlar natija bermagan.2020-yil 20-iyunga kelib Spark Beshariq tumanida qidiruv guruhi xodimlari tomonidan aniqlanib ushlangan va jarima maydonchasiga olib kirilgan.
Aniqlanishicha, qarzdor Q.B. Spark’ni allaqachon beshariqlik F.T.ga 6 ming AQSh dollariga sotib yuborishga ulgurgan. Xaridor uzoq muddat avtomashinadan foydalanmagani sababli qidiruv samara bermagani ma’lum bo‘lgan.
Ta’kidlanishicha, qidiruvdagi Spark ushlanganligi haqida ijro hujjati bo‘yicha undiruvchi T.Yusupovga xabar berilib, u Toshkentdan kelgunga qadar avtoulov Bag‘dod tuman IIB YHXB jarima maydonchasida saqlab turiladi.
Izoh (0)