2-iyul kuni “O‘zbekiston Respublikasi Davlat gerbi to‘g‘risida”gi qonun qabul qilinganiga 28 yil to‘ldi. Shu munosabat bilan Oliy Majlis Qonunchilik palatasi deputati, “Yuksalish” umummilliy harakati raisi Akmal Burhonov davlat gerbi masalasiga to‘xtalib o‘tdi.
“Ushbu qonun bugungi kun talablariga to‘liq javob bera oladimi? Misol uchun, avtomashinalar oynalari, futbolkalar, telefon g‘iloflarida davlatimiz gerbi tushirilganini kuzatish mumkin.
Qonunda davlat gerbidan foydalanishning qator tartiblari belgilab qo‘yilgan. Xususan, davlat gerbining tasviri uning katta-kichikligidan qat’i nazar, qonunga ilova qilinayotgan rangli va oq-qora tasviriga aniq mos bo‘lishi kerak, davlat gerbining tasviri tushirilgan belgilardan ishlab chiqarilayotgan yoki realizatsiya qilinayotgan tovarlarni o‘tkazish uchun tijorat maqsadlarida foydalanish mumkin emas”, — deydi u.
Deputat, shuningdek, davlat gerbiga hurmatsizlik qilganlik uchun jinoiy jazo choralari belgilab qo‘yilganini ta’kidlab o‘tdi.
“Qonunchilik bilan davlat ramzlari, shu jumladan, davlat gerbidan foydalanishda biroz erkinliklar berilishi, fuqarolarimiz ularni sevishlari, hurmat qilishlari va faxrlanishlarini namoyish eta olishlari uchun sharoit yaratish payti keldi, deb hisoblayman”, — deya so‘zlarini yakunlagan Akmal Burhonov.
Ma’lumot uchun, “O‘zbekiston Respublikasi Davlat gerbi to‘g‘risida”gi qonun 1992-yil 2-iyulda O‘zbekiston Respublikasi Oliy Kengashining X sessiyasida qabul qilingan.
O‘zbekiston gerbidagi tog‘lar qaysi rangda bo‘lishi kerak?
Davlat gerbi to‘g‘risidagi qonunga muvofiq, gerbning rangli ko‘rinishida Humo qushi va daryolar — kumush rangda; quyosh, boshoqlar, paxta chanoqlari va “O‘zbekiston” yozuvi — oltin rangda; g‘o‘za shoxlari va barglari, tog‘lar va vodiy — yashil rangda; chanoqlardagi paxta — oq rangda; lenta — O‘zbekiston bayrog‘ining ranglarini aks ettiruvchi uch xil rangda; sakkizburchak — oltin zarhal bilan hoshiyalangan holda havo rangda; yarim oy va yulduzlar — oq rangda tasvirlangan bo‘lishi kerak. Ammo aksariyat davlat tashkilotlarida foydalanilayotgan va ko‘rsatilayotgan gerblarda, masalan, tog‘lar ko‘k rangda ekanini ko‘rish mumkin.
Ma’muriy javobgarlik to‘g‘risidagi kodeksning 203-1-moddasiga ko‘ra, O‘zbekiston yoki Qoraqalpog‘istonning davlat bayrog‘i, davlat gerbi yoxud davlat madhiyasi to‘g‘risidagi qonun hujjatlarini buzish fuqarolarga bazaviy hisoblash miqdorining uch baravari (2-iyul holatiga ko‘ra — 669 ming so‘m)gacha, mansabdor shaxslarga esa bazaviy hisoblash miqdorining uch baravaridan yetti baravari (1 561 000 so‘m)gacha miqdorda jarima solishga sabab bo‘ladi.
Izoh (0)