Marko Mantovanelli 1-iyuldan Jahon bankining O‘zbekistondagi vakolatxonasining rahbari etib tayinlandi, deya xabar beradi tashkilot matbuot xizmatiga tayanib, “Gazeta.uz”.
Marko Mantovanelli avval Jahon bankining Kosovo va Shimoliy Makedoniyadagi vakolatxonalari rahbari sifatida ishlagan.
Jahon bankida faoliyat boshlashdan oldin u Yevropa va AQShda maslahat faoliyati va iqtisodiy tadqiqotlar bilan shug‘ullangan. Shuningdek, Italiya dengiz floti ofitseri sifatida ham xizmat qilgan.
U 1990-yillarning o‘rtalaridan Jahon bankida ish faoliyatini boshlagan. Faoliyati davomida u tashkilotning Vashingtondagi bosh qarorgohida, Lotin Amerikasi va Bolqon yarim orolidagi idoralarida turli lavozimlarni egallagan.
Marko Mantovanelli Boloniya universitetining (Italiya) xalqaro munosabatlar va siyosatshunoslik magistri, shuningdek, Jons Hopkins nomidagi universitetning Xalqaro ilg‘or tadqiqotlar maktabining xalqaro iqtisodiy magistrlik darajasiga ega.
Eslatib o‘tamiz, Jahon bankining O‘zbekistondagi vakolatxonasining avvalgi rahbari Xideki Mori edi.
Izoh (0)