O‘zbekistonda o‘tgan 5 oy davomida qancha oltin eksport qilingani ma’lum bo‘ldi

2020-yil yanvar—may oylarida O‘zbekiston 1,64 milliard dollarlik oltin eksport qildi. Bu haqda Davlat statistika qo‘mitasi ma’lumotlarida keltirilgan.

Ma’lumotlarga ko‘ra, 2019-yil yanvar—may oylariga nisbatan o‘sish 33,3 foizni tashkil etgan. 2020-yil yanvar—may oylarida O‘zbekistonning eksport tarkibida oltinning ulushi 31,9 foizga teng bo‘lgan.

So‘nggi yillarda O‘zbekiston oltin eksportini oshirdi. Oltin eksporti 2015-yilda 823,9 million dollar, 2016-yilda 738,2 million dollar, 2017-yilda 1,6 milliard dollar, 2018-yilda 2,91 milliard dollar va 2019-yilda 4,4 milliard dollardan ortiqroqni tashkil etdi.

Avvalroq 2020-yil yanvar—fevral oylarida O‘zbekiston 1,005 milliard dollarlik oltin eksport qilgani, oltin mamlakatning bosh eksport mahsuloti bo‘lishda davom etayotgani haqida xabar berilgandi.