Farg‘ona viloyatining So‘x tumanida umumiy qiymati 91,7 milliard so‘m bo‘lgan yirik loyiha — “Qayroq” nasos stansiyasining qurilishi boshlab yuborildi. Bu haqda “Daryo” muxbiri xabar berdi.
So‘x tuman hokimligi axborot xizmati rahbari Anvarjon Jo‘rayevning ma’lum qilishicha, asosan, qishloq xo‘jaligi va bog‘dorchilikka ixtisoslashgan So‘x tumanida yerlarni o‘zlashtirish hamda suv chiqarish eng katta muammolardan biri hisoblanadi.
Qayd etilishicha, tumandagi O‘zbekiston va Qirg‘iziston chegarasida joylashgan Qayroq mavzesida ham qishloq xo‘jaligida foydalanish mumkin bo‘lgan 1 ming 448 gektar yer mavjud bo‘lib, mazkur joy faqat yomg‘ir suvi bilan sug‘oriladi. Yil qurg‘oqchil, yomg‘ir kam yog‘gan vaqtda hech qanday hosil olib bo‘lmaydi.
1985-yilda loyihasi ishlab chiqilgan va qurilishi to‘xtatib qo‘yilgan “Qayroq” nasos stansiyasi hududga suv chiqarishning yagona yo‘li hisoblanadi.
Mazkur nasos stansiyasi maydoni davlat chegarasidan 1600 metr uzoqlikda — “Qizilqiyoq” nasos stansiyasining So‘x daryosidan suv olish nuqtasida joylashgan. “Qayroq” nasos stansiyasi 2 ko‘tarmali bo‘lib, bir soniyada 1,25 metr kub suv olish imkoniyatiga ega bo‘ladi.
Ma’lum qilinishicha, tumandagi 4642 ta xonadonning 481 gektar tomorqa maydonini suv bilan ta’minlash uchun 13 dona tik sug‘orish quduqlarini qurish va 1 dona ichki nasos agregatini rekonstruksiya qilish talab etiladi. Natijada qishloq xo‘jaligi ekinlari ekishga imkoniyat yaratilishi bilan birga 18 mingdan ortiq aholi bandligini ta’minlashga erishiladi.
Izoh (0)