Alyaska Milliy gvardiyasi 1990-yillarning o‘rtalarida Kristofer Makkendless ismli sayohatchi (Aleksandr Superbrodyaga nomi ostida tanilgan) bir necha oy davomida yashagan avtobusning evakuatsiya qilinayotgani tasvirlangan video bilan bo‘lishdi.

Kadr: YouTube

“Avtobus 142” yoki “Sehrli avtobus” 1996-yilda chop etilgan “Yovvoyi sharoitlarda” nomli hujjatli kitob va 2007-yili shu nomdagi film taqdim etilganidan so‘ng, mashhurlikka erishgan. Tashlandiq transport vositasidan Kristofer Makkendless Alyaskaning kimsasiz qismida yashash uchun foydalangan.

Sayohatchi faqatgina tabiat resurslaridan foydalangan holda sivilizatsiyadan uzoqda yashashni rejalashtirgan. Biroq u o‘rmonda yashashni boshlaganidan 114 kun o‘tib vafot etgan. Uning jasadi mazkur avtobus ichidan topilgan.

Makkendlessning bu kabi xatti-harakati ko‘plab sayohatchilarni ilhomlantirgan bo‘lib, ular ushbu avtobus tomon safar uyushtira boshlagan. Aynan shu holat mahalliy hukumatni evakuatsiyani amalga oshirishga majbur etgan. 2009-yildan 2017-yilga qadar 15 marotaba qutqaruv-qidiruv operatsiyalari o‘tkazilgan, ko‘plab turistlar jarohat olgan, yana bir nechtasi cho‘kib ketgan.

Avtobusni boshqa joyga ko‘chirish uchun, CH-47 Chinook og‘ir harbiy transport vertolyotidan foydalanilgan.