Meksikada yangi turdagi koronavirus bilan kasallangan uch egizak dunyoga keldi, deb yozadi “Korrespondent.net”.
Ikki o‘g‘il va bir qiz chaqaloq San-Luis—Potosi shtatida 17-iyun kuni kesarcha kesish yo‘li bilan dunyoga kelgan. Shifoxona tartib-qoidasiga binoan yangi tug‘ilgan chaqaloqlardan koronavirus testi uchun namuna olingan. Natijada uch chaqaloqning ham koronavirusga chalingani aniqlangan.
Shtat sog‘liqni saqlash boshqarmasi boshlig‘i Migel Anxel Lutsou Steyner ushbu holatni butun dunyo uchun tushunarsiz deb atagan. Qayd etilishicha, chaqaloqlarning ota-onasida koronavirus aniqlanmagan.
Ikki chaqaloqning ahvoli yaxshi, ularda koronavirus simptomlari kuzatilmagan. Uchinchi chaqaloqda kasallik simptomlari paydo bo‘lgan. Unga hozirda pnevmoniya tashxisi qo‘yilib, nazoratga olingan.
Mutaxassislarning aytishicha, bu bir vaqtning o‘zida bir necha chaqaloqning koronavirus bilan tug‘ilishiga oid birinchi holat.
Chaqaloqlarning ota-onasi hamda ular bilan muloqotda bo‘lgan shifokorlar karantinga olingan. Ular koronavirusga test topshirgan, natija hali chiqmagan.
Izoh (0)