“Daryo” o‘tib borayotgan haftaning qizg‘in bahslariga sabab bo‘lgan tvitlarni diqqatingizga havola etadi.

“AQShda Jorj Floydning o‘limi ortidan politsiya budjetini qisqartirishni talab qilayotganlarga AQSh prezidentining javobi: ‘Aksar demokratlar polisitya budjetini kesishni va politsiya bo‘linmalarini tugatishni xohlashmoqda. Qanday aqlsizlik!’”, –  Donald Tramp, AQSh prezidenti.

“Azaldan insonlar bir xil. Kimsasiz bir yerda adashib qoldingiz va to‘satdan siz tomonga kelayotgan kimsaga ko‘zingiz tushdi. Uning irqi, millati yoki dini haqida o‘ylab o‘tirmaysiz. Unga duch kelganingizdan quvonasiz”, – Dalay lama, Tibet buddistlari rahnamosi.

“AQSh davlat kotibi Mayk Pompeoning AQSh va Xitoyni taqqoslashi: AQSh va Xitoyni taqqoslab bo‘lmaydi. Bizda qonun ustuvorligi mavjud, Xitoyda esa mavjud emas. Bizda so‘z erkinligi bor, Xitoyda yo‘q. Bizda diniy e’tiqod erkinligi himoya qilingan, Xitoy esa ko‘p yillardan beri boshqa dinlarga qarshi kurashib keladi. Xitoy qattiqqo‘llik bilan kommunizmni targ‘ib qiladi, AQSh esa erkinlikni himoya qiladi”.

“15-iyun Ozarbayjon xalqining mustaqillik bayrami. Ozarbayjonlik qardoshlarimizga Turkiyadan salomlar”, – Binoli Yildirim, Turkiya adolat va taraqqiyot partiyasi rahbari.

“Politsiya tarafidan o‘ldirilgan Jorj Floydning 6 yoshli qizchasi aktrisa Barbara Streyzand tufayli Disney kompaniyasining aksiyadori bo‘ldi”, – CNN yangiliklar nashri.

“London hokimi londonliklarga eslatma bilan murojaat qildi: londonliklar, bugundan boshlab jamoat transportidan foydalanganingizda niqob taqib yurishingiz shart”, – Sodiq Xon, London shahri hokimi.

“Kim qancha yadro quroliga egalik qiladi?

Qurollanishni tadqiq qiluvchi institut baholashicha, 2019-yilda yadro qurollari miqdori kamayganiga qaramasdan, dunyoda 2020-yil yanvar holatiga ko‘ra, hamon 13 400 dona yadro qurollari saqlab kelinmoqda. Bu qurollarning aksari AQSh va Rossiyaga tegishlidir”, – RFE/RL.

“Kecha Filippinda Maria Ressa jurnalistik faoliyati uchun qamoqqa tashlandi. Amal Klunining boshqa jurnalistlarga yuborgan nomasida jon bor: ‘Sukut saqlang, aks holda siz navbatdagi mahkum bo‘lasiz’. Matbuotga qarshi qaratilgan hujumlarga qarshi turishimiz shart. Bu hujumlar demokratiyaga qarshi qaratilgan”, – Hillari Klinton.

“Fransuz Gvianasi, Mayottada koronavirusga chalinganlarga g‘amxo‘rlik qilayotganlar uchun testlar va himoya vositalari yetishmayapti. Bu aqlbovar qilib bo‘lmas aqlsizlik. Hukumat bu inqirozga qarshi kurashishda avval boshidanoq hech narsa qila olmasligi ma’lum edi. Mamlakatimizdagi har bir shaxsning hayoti qadrli”, – Marin Le Pen, fransiyalik siyosatchi, “Milliy front” partiyasi yetakchisi.

“Yevropa Ittifoqi qayta ochilmoqda, biroq hamma sohalarda bo‘lgani kabi, yangi status kvo aynan eski davrlardagidek bo‘lmasligi aniq”, – Matina Styuvis Gridnef, The New York Times nashrining Yevropadagi muxbiri.

“Ingliz tilidagi candy so‘zi kub shaklidagi shakar ma’nosini beruvchi fors tilidagi “qand ” so‘zidan kelib chiqqan. Har kuni g‘arbcha jaranglaydigan limon, tamarind – hind xurmosi, pista, unabi (xitoy xurmosi) – bularning barchasi fors tilida paydo bo‘lgan so‘zlardir”, – Aleks Shams, Antropologiya sohasi tadqiqotchisi.

“Jahon banki guruhining vitse-prezidenti va yetakchi iqtisodchi mutaxassisi faoliyatini boshlashdan xursandman. Bugun meni iliq kutib olganingiz uchun rahmat Jahon banki”, – Karmen Reynxardt, Jahon banki yetakchi mutaxassisi.

Ishlovchilar o‘z ishlaridan qoniqish hissi qilishning mamlakatlar taqisomotidagi foizi:

Hindiston – 89 foiz;

Meksika – 85 foiz;

Turkiya – 80 foiz;

AQSh – 78 foiz;

Ispaniya – 77 foiz;

Braziliya – 74 foiz;

Kanada – 74 foiz;

Xitoy – 74 foiz;

Buyuk Britaniya – 74 foiz;

Malayziya – 73 foiz;

Germaniya – 71 foiz;

Avstraliya – 70 foiz;

Italiya – 69 foiz;

Fransiya – 68 foiz;

Yaponiya – 42 foiz.

Workmonitor so‘rovlaridan olindi.

“Jamiyat va iqtisod yana oyoqqa turayotganini ko‘rish yurakka zavq bag‘ishlaydi. Tez orada qovoqxonalar ham ochiladi, restoran va kafelar allaqachon ish boshladi. Oilalar qayta birlashmoqda. Ikki oy oldingi vaziyatni bugun bilan taqqoslang. Biz bu yerga uzoq yo‘l bosib keldik, ammo insonlarni boy berganimiz asosiy fojiamiz”, – Karol Sikora, britaniyalik onkolog olim.

“O‘zbekistonlik Oliy Majlis deputati, ‘Adolat’ partiyasi a’zosi Gulruh Agzamova andijonlik vatandosh ichki ishlar qiynog‘i sabab vafot etishi yuzasidan keskin chiqish qildi. U 2005-yildagi Andijon voqealarini muhokama qildi. Ichki ishlar vazirligi xodimlarini jazolashning o‘zi yetarli emasligi haqida gapirdi va tizim chuqur islohotlar amalga oshirilishi kerakligiga ishora qildi”, – Jen Murtazashvili, Pittsburg universiteti professori.

Jahongir Ergashev tayyorladi.