Samarqand viloyat ichki ishlar boshqarmasi Yo‘l harakati xavfsizligi boshqarmasidan haydovchiga tovon undirish belgilandi. Bu haqda fuqarolik ishlari bo‘yicha Samarqand viloyat sudi sudyasiga tayanib, “Zarnews” xabar berdi.
Ma’lumotlarga ko‘ra, 2018-yil 17-may kuni Damas rusumli mashinani Oqdaryo tumani Loyish shaharchasida boshqarib kelayotgan Anvar ismli fuqaroni IIB YHB xodimi to‘xtatgan. U haydovchiga “Yo‘l harakati qoidasi”ning 194 va 56-bandlarida ko‘rsatilgan talablarni buzib, sidirg‘a chizig‘i ustida harakatlangani uchun ma’muriy bayonnoma rasmiylashtirgan. Oqdaryo tumani IIB YHXB unga nisbatan Ma’muriy javobgarlik to‘g‘risidagi kodeksning 128-moddasiga (“Haydovchilarning transport vositalarini piyodalar yo‘lkalaridan yurgizishi, yo‘l belgilari va yo‘l harakatining boshqa qoidalari talablariga rioya etmasligi”) asosan 86 ming 120 so‘m ma’muriy jarima solish to‘g‘risida qaror chiqargan.
Haydovchi jarima to‘lashga majbur bo‘lgach, holatdan norozi bo‘lib, Oqdaryo tumani ma’muriy sudiga shikoyat ariza bilan murojaat qilgan. Ta’kidlanishicha, sudning hal qiluv qarori bilan yuqorida keltirilgan jarima tayinlash haqidagi qarori bekor qilingan.
Shundan so‘ng, haydovchi jarima qaytarilmaganligi, IIB YHXB rahbariyati va boshqarma xodimining noqonuniy xatti-harakatlari natijasida u idorama-idora yugurishga majbur bo‘lganligi, fuqarolik haq-huquqlarini oyoq osti qilishlari oqibatida juda katta ma’naviy zarar yetganligi uchun fuqarolik sudiga da’vo ariza qo‘zg‘atib, moddiy va ma’naviy zararni undirishni so‘ragan.
Sud haydovchiga g‘ayriqonuniy ma’muriy jazo tayinlanib, asossiz ravishda jarimaga tortilganligi oqibatida u ma’naviy qayg‘urish va noqulaylikni boshidan kechirganligini, jarimani to‘lab moddiy zarar ko‘rganligini inobatga olib, Samarqand viloyat ichki ishlar boshqarmasi yo‘l harakati havfsizligi boshqarmasidan da’vogar foydasiga 86 120 ming so‘m moddiy zarar, 1,5 million so‘m ma’naviy zararni undirishni belgiladi.
Shuningdek, 608 ming 190 so‘m dastlab to‘langan davlat boji, 16 ming 190 so‘m pochta xarajati ham IIB YHXBdan undiriladigan bo‘ldi.
Izoh (0)