Самарқанд вилоят ички ишлар бошқармаси Йўл ҳаракати хавфсизлиги бошқармасидан ҳайдовчига товон ундириш белгиланди. Бу ҳақда фуқаролик ишлари бўйича Самарқанд вилоят суди судьясига таяниб, «Zarnews» хабар берди.
Маълумотларга кўра, 2018 йил 17 май куни Damas русумли машинани Оқдарё тумани Лойиш шаҳарчасида бошқариб келаётган Анвар исмли фуқарони ИИБ ЙҲБ ходими тўхтатган. У ҳайдовчига «Йўл ҳаракати қоидаси»нинг 194 ва 56-бандларида кўрсатилган талабларни бузиб, сидирға чизиғи устида ҳаракатлангани учун маъмурий баённома расмийлаштирган. Оқдарё тумани ИИБ ЙҲХБ унга нисбатан Маъмурий жавобгарлик тўғрисидаги кодекснинг 128-моддасига («Ҳайдовчиларнинг транспорт воситаларини пиёдалар йўлкаларидан юргизиши, йўл белгилари ва йўл ҳаракатининг бошқа қоидалари талабларига риоя этмаслиги») асосан 86 минг 120 сўм маъмурий жарима солиш тўғрисида қарор чиқарган.
Ҳайдовчи жарима тўлашга мажбур бўлгач, ҳолатдан норози бўлиб, Оқдарё тумани маъмурий судига шикоят ариза билан мурожаат қилган. Таъкидланишича, суднинг ҳал қилув қарори билан юқорида келтирилган жарима тайинлаш ҳақидаги қарори бекор қилинган.
Шундан сўнг, ҳайдовчи жарима қайтарилмаганлиги, ИИБ ЙҲХБ раҳбарияти ва бошқарма ходимининг ноқонуний хатти-ҳаракатлари натижасида у идорама-идора югуришга мажбур бўлганлиги, фуқаролик ҳақ-ҳуқуқларини оёқ ости қилишлари оқибатида жуда катта маънавий зарар етганлиги учун фуқаролик судига даъво ариза қўзғатиб, моддий ва маънавий зарарни ундиришни сўраган.
Суд ҳайдовчига ғайриқонуний маъмурий жазо тайинланиб, асоссиз равишда жаримага тортилганлиги оқибатида у маънавий қайғуриш ва ноқулайликни бошидан кечирганлигини, жаримани тўлаб моддий зарар кўрганлигини инобатга олиб, Самарқанд вилоят ички ишлар бошқармаси йўл ҳаракати ҳавфсизлиги бошқармасидан даъвогар фойдасига 86 120 минг сўм моддий зарар, 1,5 миллион сўм маънавий зарарни ундиришни белгилади.
Шунингдек, 608 минг 190 сўм дастлаб тўланган давлат божи, 16 минг 190 сўм почта харажати ҳам ИИБ ЙҲХБдан ундириладиган бўлди.
Изоҳ (0)