Narpay tuman xalq ta’limi bo‘limi mudiri Mirzohid Yo‘ldoshev o‘qituvchilarni hojatxona ta’mirlashga majburlagani uchun 11 million so‘m jarimaga tortildi. Bu “Daryo” muxbiri Farhod Norbo‘tayev xabar berdi.
Narpay tumanidagi 1-maktabda olib borilgan ta’mirlash ishlaridan lavha.
Foto: “Daryo”
Xalq ta’limi vazirining 2019-yil 17-yanvardagi buyrug‘iga ko‘ra, umumiy o‘rta ta’lim maktabi direktorlarining lavozim majburiyatlari tasdiqlangan bo‘lib, direktorning lavozim majburiyatiga maktab hojatxonasini ta’mirlash kiritilmagan.
Shunday bo‘lsa-da, viloyat bandlik bosh boshqarmasi davlat mehnat inspeksiyasi xodimlari tomonidan olib borilgan o‘rganish jarayonida Narpay tumandagi 32-maktab direktori Jo‘raqul Xolmurodov tuman XTB mudiri tomonidan maktab hojatxonasini ta’mirlashga majburlangani ma’lum bo‘lgan. Direktorning aytishicha, u hojatxonani ta’mirlash uchun santexnika jihozlarini ham o‘z hisobidan sotib olgan.
Mavzuga doir:
32-maktab direktori Jo‘raqul Xolmurodovning aytishicha, mudir Mirzohid Yo‘ldoshev 2020-yilning 22-may kuni maktabga hojatxona ta’mirini ko‘zdan kechirish uchun borgan. Mudir ta’mirlash ishlari oxiriga yetmaganligi uchun e’tiroz bildirib, direktorga ta’mir yakuniga yetmasa bo‘shashi to‘g‘risida arizasini olmoqchiligini bildirgan.
Mudir hojatxona ta’miri yakuniga yetganini bilib, 2020-yil 27-may kuni maktabga takroran borgan va direktorga bosim o‘tkazgan holda hojatxonadagi ta’mirlash ishlarini “Narpay standart” MChJ bajarganligi to‘g‘risida ma’lumot yozdirib olgan.
Tumandagi 33-maktab direktori Zuhra Daminova ham XTB mudiri Mirzohid Yo‘ldoshev unga maktab hojatxonasini ta’mirlashni buyurganini, agarda bajarmasa ishdan bo‘shatish bilan tahdid qilganligini ma’lum qilgan.
O‘rganish davomida aniqlanishicha, mudir mazkur talabni boshqa maktab direktorlariga ham aytgan va noqonuniy talabini bajartirgan.
Tumandagi 1, 10, 12, 22-maktab direktorlari T.Sa’dinov, B.Otaqulova, M.Ochilova, E.Boltayevlar ham mudirning noqonuniy talabi haqida aytib bergan.
Samarqand viloyat bandlik bosh boshqarmasi davlat mehnat inspeksiyasi inspektorining ma’lum qilishicha, ushbu holat yuzasidan to‘plangan hujjatlarga ko‘ra, Narpay tuman XTB mudiri Mirzohid Yo‘ldoshev Ma’muriy javobgarlik to‘g‘risidagi kodeksning 51-moddasi 1-qismida (Mehnatga ma’muriy tarzda majburlash) nazarda tutilgan huquqbuzarlikni sodir qilganligi sababli, bazaviy hisoblash miqdorining 50 baravari, ya’ni 11 million 150 ming so‘m miqdorida jarimaga tortilgan.
