Buyuk Britaniya avtomobil bozori boshqa ko‘plab davlatlar kabi koronavirus pandemiyasi va mamlakat rahbariyati tomonidan joriy etilgan karantin cheklovlari sabab katta zarar ko‘rdi. Shunga qaramay, hukumatda iqtisodiyotni “oyoqqa turg‘izish” bo‘yicha, xususan, avtomobil sohasiga tegishli reja mavjud, deb xabar beradi Engadjet.
Telegraph manbalarining so‘zlariga ko‘ra, Britaniya hukumati ichki yonuv dvigateliga ega avtomobillarini elektromobilga almashtirmoqchi bo‘lganlarga 7600 dollar to‘lashni rejalashtirmoqda. Taxminlarga ko‘ra, mamlakat bosh vaziri Boris Jonson bu haqda 6-iyul kuni iqtisodiyotni qutqarishga oid ulkan rejan doirasida e’lon qiladi.
Bu kabi rejaning bir nechta ijobiy tomonlari bor. Birinchidan, u rostdan ham avtomobillar savdosini jonlantirishi mumkin. Ikkinchidan, elektromobil ishlab chiqaruvchi Jaguar va Mini kabi mahalliy markalarning ahvolini yaxshilashga xizmat qiladi. Nihoyat, elektromobillarga o‘tish borasidagi yangi rag‘bat uzoq muddatli maqsadni amalga oshirishga yordam beradi — Buyuk Britaniyada 2035-yilga borib ichki yonuv dvigateliga ega avtomobillar savdosini to‘xtatish va to‘liq elektromobillarga o‘tish.
Elektromobilga o‘tishda taklif etiladigan kattagina mukofot mazkur jarayonni tezlashtirib yuborishi mumkin. Biroq hozircha infratuzilma borasida ba’zi shubhalar qolmoqda: bir vaqtning o‘zida ko‘pchilik elektromobilga o‘tishni istab qolsa, mavjud elektr quvvatlantirish tarmoqlari yetmay qoladi.
Izoh (0)