Sergelida tuman hokimligidan O‘zgarish ko‘prigigacha bo‘lgan yo‘l vaqtinchalik yopildi

Toshkent shahar hokimligi 28-may, payshanba kuni yo‘l ta’mirlash ishlari olib borilishi sababli Sergelidagi yo‘lning bir qismi vaqtinchalik yopilganini ma’lum qildi.

“Bugun kun davomida yo‘l ta’mirlash ishlari olib borilishi sababli Yangi Sergeli ko‘chasining Sergeli tuman hokimligidan Gavhar ko‘chasigacha (O‘zgarish ko‘prigi) bo‘lgan yo‘nalishdagi qismi yopiladi”, — deyiladi xabarda.

Eslatib o‘tamiz, Sergeli tumanini Toshkent shahrining markazi bilan bog‘lovchi asosiy yo‘l — Yangi Sergeli ko‘chasi 27-may kuni soat 7:30 dan boshlab Toshkent halqa avtomobil yo‘li bilan kesishmadagi ko‘prik (Qo‘yliq ko‘prigi)dan boshlab yopilgan, biroq rasmiylar aholini bu haqda oldindan ogohlantirmagandi.