Qirg‘iziston va Tojikiston chegarasida yana ikki davlat harbiylari o‘rtasida to‘qnashuv sodir bo‘ldi. Ikki mamlakatning chegara qo‘shinlarining idoralari ushbu holat yuzasidan muzokaralar olib bormoqda. Bu haqda Qirg‘iziston davlat chegara xizmatiga tayanib “RIA Novosti” xabar bergan.
Qirg‘izistonlik chegarachilar bergan axborotga ko‘ra, Vorux anklavi aholisi Botkent viloyati Botkent tumani Mo‘ynoq qishlog‘i hududida chorva mollarini boqishga uringan. Qirg‘iziston chegara xizmati bunga qarshilik qilgan, oqibatda tojik tomonida noma’lum shaxs o‘t ochgan.
So‘ngra mahalliy vaqt bilan 11:40 atrofida Qirg‘iziston hamda Tojikiston chegarachilari o‘rtasida qisqa muddatli otishma sodir bo‘lgan. To‘qnashuvda Qig‘iziston tomonidan hech kimga talafot yetmagan. Agentlikning yozishicha, hozirda ikki davlat chegarachilari o‘rtasida kelishmovchilik kuzatilgan hududdagi vaziyat “nisbatan barqaror”.
Eslatib o‘tamiz, 2019-yilning 16-sentabrida Qirg‘iziston va Tojikiston o‘rtasida otishma bo‘lgan va natijada Qirg‘iziston chegara xizmati xodimi vafot etgan edi. Har ikki davlat o‘rtasida 976 kilometrlik chegara mavjud bo‘lib, shundan faqat 504 kilometri bo‘yicha kelishuvga erishilgan. Chegaraning qolgan hududida esa vaqti-vaqti bilan kelishmovchiliklar ro‘y berib turadi.
Bu kabi muammolar, nizolar, otishmalar tez-tez sodir bo‘lib turadi, sababi ikki davlat o‘z chegara hududlarini belgilashni kelisha olmagan, jumladan, muammoli Vorux qishlog‘i borasida ham murosaga kelinmagan. Belgilab olinmagan hududlarda yer, suv, chegarani noqonuniy kesib o‘tish va etnik to‘qnashuvlar kuzatiladi. Nizolar vaqtida tosh bilan bir-biriga hujum qilish ba’zan esa o‘qotar qurollardan foydalanib otishmalar sodir etish holatlari kuzatiladi.
Avvalroq 8-mayda Tojikiston chegarasida tojik va qirg‘iz chegarachilari o‘rtasida otishma sodir bo‘lgandi.
Izoh (0)