“Shunga ko‘ra, ‘O‘rikzor’ savdo majmuasida epidemiologik surishtiruv ishlarini o‘tkazish hamda kasallik tarqalishining oldini olish, bozorda epidemiyaga qarshi va profilaktik tadbirlarni tashkil qilish hamda ta’mirlash, sanitar tozalash va zararsizlantirish ishlarini o‘tkazish maqsadida Uchtepa tumani hokimligi bilan kelishilgan holda bozor ma’muriyati tomonidan savdo majmuasi faoliyati vaqtincha to‘xtatildi”, — deyiladi SSV axborotida.
Rasmiy axborotda sotuvchida kasallik aynan qachon aniqlangani, u aynan qayerda istiqomat qilishi, hozirgacha necha kishi karantinga olingani haqida batafsil axborot berilmagan. Ta’kidlashlaricha, epidemiologik surishtiruv yakunlanib, sanitar tozalash va zararsizlantirish tadbirlari amalga oshirilgach, bozor faoliyatini davom ettiradi.
Toshkent shahar Sanitariya-epidemiologik osoyishtalik markazi bosh vrachi Malika Qudratxo‘jayevaning ta’kidlashicha, “O‘rikzor” bozorida 789 fuqarodan profilaktika maqsadida koronavirus infeksiyasiga laborator tahlillar uchun surtma namunalar olingan. Umuman, hozirgacha Toshkentdagi dehqon bozorlari va yirik savdo majmualarida ishlovchi 6251 fuqaro — ishchi-xodimlar, sotuvchilar hamda yuk tashuvchilar koronavirusga tekshirilgan.
Izoh (0)