O‘zbekistonda 23-may soat 17:00 holatiga ko‘ra, koronavirusga chalinganlar soni 11 kishiga ko‘payib, 3089 nafarga yetdi, deya xabar bermoqda Sog‘liqni saqlash vazirligi.
Yangi kasallanish holatlarining bittasi Dubay—Toshkent yo‘nalishidagi charter reysda kelgan, yana biri Qozog‘iston orqali kelgan xalqaro yuk tashuvchi avtomashina haydovchisida qayd etilgan.
Qolgan to‘qqiz holatda, jumladan, ikki holatda Toshkent shahrida, yetti holatda Samarqand viloyatida aholi orasida koronavirus aniqlangan.
“Hozirda ushbu bemorlar bilan muloqotda bo‘lgan barcha fuqarolar belgilangan tartibda qat’iy karantinga olingan”, — deyiladi SSV axborotida.
Avvalroq Sog‘liqni saqlash vazirligi Toshkentdagi “O‘rikzor” bozoridagi do‘konlardan birining sotuvchisida koronavirus aniqlangani, shu bois bozor vaqtincha yopilganini ma’lum qilgan edi.
Eslatib o‘tamiz, hozirgacha O‘zbekistonda koronavirusga chalinganlarning 2525 nafari sog‘aygan, 551 nafar bemor davolanishni davom ettirmoqda, 13 nafar bemor esa koronavirus infeksiyasi asoratlari oqibatida vafot etgan.
Izoh (0)