Checheniston rahbari Ramzan Qodirov sochini kalga oldirdi. Internetda buni tasdiqlovchi video paydo bo‘ldi. Unda Qodirov chechen tilida gapiradi.
“Bizda hamma sartaroshxonalar yopiq, shuning uchun men ota-bobolarimiz qilgan ishni qilib, sochimni kalga oldirdim”, — deydi Qodirov.
Checheniston rahbari islom dinida sochni kalga oldirish ma’qul amal hisoblanishini aytib, barcha erkaklarga shunday yo‘l tutishni maslahat bergan.
Qodirov koronavirusga qarshi kurashish shtabining yig‘ilishidan bir kun o‘tib kal bo‘lgan. Ushbu yig‘ilishda mahalliy aholi vakillaridan biri undan sartaroshxonalar va go‘zallik salonlarining ochilish ehtimoli haqida so‘ragan.
“Muqaddas Ramazon oyi yaqinlashmoqda. Erkaklarga kal bo‘lib, boshga biroz dam berishni maslahat beraman” — deb javob bergan ushbu savolga Qodirov.
Qodirovning tavsiyasiga mamlakatdagi amaldorlar ham amal qilgan holda sochlarini kalga oldirdi. Xususan, Checheniston sog‘liqni saqlash, transport vazirliklari, IIV va gvardiya rahbarlari sochlarini kal qildirgan.
Izoh (0)