Buxorolik fermer bedasini payhon qilgan hamqishlog‘ini urib o‘ldirib qo‘ydi

28-mart kuni Qorako‘l tumani O‘tiq-Do‘rman qishlog‘ida yashovchi 28 yoshli fuqaro B.D. “Shohjahon chorva zamini” fermer xo‘jaligiga qarashli cho‘l hududida o‘zaro janjal oqibatida 58 yoshli N.X. ismli hamqishlog‘ini urib-tepib, jarohat yetkazgan. Bu haqda IIV huzuridagi Tergov departamenti xabar berdi.

Fuqaro N.X. olingan tan jarohatlari oqibatida kasalxonaga yotqizilgan va ko‘rsatilgan tibbiy muolajalarga qaramay 6-aprel kuni vafot etgan.

Mazkur holat yuzasidan Qorako‘l tumani IIB huzuridagi Tergov bo‘linmasi tomonidan Jinoyat kodeksining 104-moddasi 3-qismi “d” bandi (“Odam o‘limiga sabab bo‘lgan badanga qasddan og‘ir tan jarohati yetkazish”) bilan jinoyat ishi qo‘zg‘atilgan.

Dastlabki tergov jarayonida aniqlanishicha, janjal N.X.ga tegishli bo‘lgan qo‘y podasi, B.D.ning beda maydoniga kirib payhon qilganligi ortidan kelib chiqqan.

Jinoyat ishi bo‘yicha B.D. gumon qilinuvchi tariqasida jalb qilingan va o‘rnatilgan tartibda ushlangan.