Dietologlarning fikricha, pandemiya odamlarda ommaviy vazn ortishini keltirib chiqaradi. Bu haqda Daily Mail yozmoqda.
Foto: Pixabay
“Ushbu holat kam harakatli hayot tarzi va uyda ko‘p ovqat iste’mol qilish bilan bog‘liq”, — deyiladi xabarda.
Buyuk Britaniyalik dietolog Jennifer Obertning ta’kidlashicha, hozirgi kunda odamlar stress holatida, bu esa ularni nosog‘lom ovqatlanishga undaydi.
Mutaxassislar karantin paytida odamlarga avvalgi tana vaznini saqlab qolish juda qiyin bo‘lishini aytmoqda.
“Ortiqcha vazn to‘plash hammamizda kuzatiladi. Hatto karantinda sport bilan shug‘ullanishga harakat qilayotganlarda ham”, — deydi fransiyalik trener va dietolog Julian Mersye.
Vazn ortishi bolalarga ham taalluqli. Ota-onalar o‘z farzandlariga ko‘chada tengdoshlari bilan o‘ynashlari o‘rniga uyda shirinliklar yoki “zarar”li mahsulotlar yeyishga ruxsat beradi.
Mutaxassislar ortiqcha vazn to‘plamaslik uchun kun tartibiga rioya qilish hamda uy sharoitida sport bilan shug‘ullanishni tavsiya qilmoqda.
