Shavkat Mirziyoyev karantin vaqtida to‘y-marosim o‘tkazganlarni “mas’uliyatsizlar” deb atadi

Prezident Shavkat Mirziyoyev 3-aprel, juma kuni, koronavirus tarqalishi va uning oqibatlariga qarshi kurash masalalari bo‘yicha videoselektor yig‘ilishi o‘tkazdi.

Prezident yig‘ilishda “qancha ogohlantirish va tushuntirish ishlariga qaramay, joylarda karantin qoidalari buzilayotganini” afsus bilan aytib o‘tdi.

Prezident matbuot xizmatining qayd etishicha, hozirgacha 22 mingdan ziyod ana shunday holat aniqlandi, 330 kishi karantin hududini tashlab ketgan.

“Karantin vaqtida ayrim mas’uliyatsiz shaxslar 24 ta turli ommaviy marosimlar o‘tkazganini sira oqlab bo‘lmaydi. Butun xalqimiz hayotiga xavf solayotgan bunday noma’qul ishlarga nisbatan keskin choralar ko‘riladi”, — dedi Prezident.

Avvalroq karantin vaqtida Toshkentning Chilonzor tumanida to‘y o‘tkazishga urinish holatining oldi olingani, Yunusobodda esa kuyov-navkar marosimini tashkillashtirgan fuqaroga nisbatan jinoyat ishi qo‘zg‘atilgani haqida xabar berilgan edi.